Farano any daholo e !

29/12/2012

Androany sisa no andro fiasana alohan’ny hivalonan’ity taona 2012 ity. Andro tsy fiasana kanefa handraisan-karama kosa ny alatsinainy 31 desambra araka ny fanapahan-kevitry ny Fanjakana. Ny jadon’ny fitondran-dRajoelina no nanamarika ity taona 2012 madiva hifarana ity. Voakasik’izany jadona izany avokoa ny sehatra rehetra indrindra fa ny fahalalahana sy ny demôkrasia ary ny zon’olombelona. Nisongadina ihany koa anefa ny fahasahian’ny olona mamaky bantsilana ireo lozoka sy fahalovana maro samy hafa teto amin’ny firenena toa ireny ampamoaka nataon’ny tangalamena Zakariasy Patrick ireny. Novidian-dafo tokoa anefa izany fijoroana nataony izany; tsy afaka nankalaza ny krismasy sy taom-baovao miaraka amin’ny vady aman-janany akory ny tenany.

Nanamarika ity taona 2012 ity ihany koa ny fitanilàna amin’ny fampiharana ny lalàna eo amin’ny olom-pirenena. Raha kinga sy mailaka ny mpitandro filaminana ary tsy maintsy mahita hevitra hisamborana ireo izay tsy mitovy hevitra amin’ny mpitondra; dia sinema sy sarin’ady kosa no nataon’izy ireo tamin’ny raharaha Alain Ramaroson. Voaporofo ihany koa fa Fitsarana tsy manana ny fahaleovantenany no misy ary mbola manaiky ny baikon’ny Fahefana Mpanatanteraka.
Ireo hetsika sendikaly maro Paramed, Sempama, Seces, sendikan’ny mpanao gazety, ny sendikan’ny mpiandry fonja, ny Smm anefa no tena zava-dehibe indrindra. Midika tsy fankatoavana izao fitondrana kitoatoa hanjakan’ny kolikoly sy ny sandry ary ny basy mantsy ireny hetsika ireny. Raha tsorina ny resaka dia mpitondra tsy manome hasina ny fanahy sy ny saina na tsy manana izany ao aminy no mitantana ny firenena nanomboka ny taona 2009.
Koa rehefa hifarana ihany ny taona 2012, maninona raha faranana any daholo mihitsy ny zava-drehetra e! Tsy tokony hitoetra eto amin’ny firenena intsony izao Tetezamita mampahory vahoaka izao amin’iny taona 2013 ho avy iny. Rehefa tsy hisy ihany ny fifidianana satria matahotra hiatrika izany ny filoha Rajoelina sy ny forongony dia tokony ho Tetezamita vaovao hitsinjo marina izay marary amin’ny vahoaka no hisy. Farano any daholo e!