Janoary ô, tahio ny Tanindrazanay

03/01/2013

Tapitra ny fety, ary tsy maintsy hihatrika ny zavamisy ny tsirairay, dia ny asa fanao an-davan’andro izany. Voky ny kobo nandritra ny fety ary samy nanao izay nahafalifaly azy mba tsy ilazàna hoe nanao izay danin’ny kibony ny tsirairay. Na dia teo aza ireo nilàza tena fa mailo, dia tsy voatana fa nanao fandaniana be ihany nandritra ny fety, na dia ny hamalifalina ny ankohonana fotsiny ihany aza.

Fa tonga ity ny volana janoary, ilay azo lazaina fa valim-pidinana, ary ambara ihany koa fa volana lava indrindra amin’ny taona. Rahoviana tokoa moa vao ho tonga ny fandraisam-bola manaraka ? Dia inona no lerana mandrapahatongan’izany ? Fa mandritra ity volana janoary ity ihany koa no tokony hisian’ny vahaolana eo amin’ny samy mpanao politika, amahana ny olana mianjady amin’ny firenena. Antenaina fa hahaomby ny fanelanelanana karakarain’ny FFKM ankehitriny ity.
Raha ny kabarin’ny filoha farany teo mantsy no antenaina dia ny kintana isaina, hoy ny vazivazy. Kabary poakaty, tsy misy fanantenana ho an’ireo fadiranovana no nasaina nohenoin’ny Malagasy. Fa toa nidehadehaka nitanisa ireo “zavabita” fotsiny no natao. Ary dia dedaka tokoa moa ny anao lahy fa nahatanteraka ny fanamby, hono, na dia tetezamita aza no diavina.
Raha ho an’ireo ao anaty fitondrana tokoa dia tsy azo lavina fa misy dia misy ny fiovàna, indrindra ny momba ny tahiry ao am-paosiny. Ary amin’izireny dia mandeha tsara io fitondrana io.
Fa mba nijery ny tena zavamisy fa tsy zavabita ve Rajoelina ? Fa toa diso ihany izahay raha dinihina ka. Hay moa zavabita ihany koa ny zavamisy atrehana amin’nizao fotoana izao : fahantrana, tsy fandriampahalemana, tsy fananana asa… Nahagaga fa tsy mba nambarany ho anisan’ny fanamby tanteraky ny fitondrana ireo, nandritra ilay kabary, kanefa anie ka zavabita izao e !
Mangata-pamelana amin’ny volana janoary isika mianakavy mba tsy dia ho ampijaliany loatra mandrapaha-tapiny. Hifonana mihitsy aza izy raha azo atao fa tsy hamerina intsony amin’ny herin-taona. Hifanaraka izahay mpanao politika ka hiroso marina any amin’ny tena vahaolana. Janoary ô, tahio ny Tanindrazanay…