Mandriaka indray ny rà

04/01/2013

Vatana mangatsiakan’ny zanany sisa novantanin’i Hery Buisson izay nisy naka an-keriny; toraka izany koa ilay tovovavy maty notsindromina tamin’ny antsy teny Ankatso, ankoatra ilay raim-pianakaviana tao amin’ny distrikan’i Manandriana. Mbola nahitana razana miisa roa koa anefa teny amin’ny ranon’Ikopa. Mandriaka indray ny rà ! Be loatra ny rà latsaka nandritra ity fitondrana Tetezamita ity ; tsy misy vidiny amin’ny olona sy ny mpitondra intsony izany aina izany.

Hatramin’izao anefa mbola ankamantatra ny fifidianana. Hatreto aloha tsy mbola nisy nanome antoka na avy amin’ny mpitondra fanjakana izany na avy amin’ny fianakaviambe iraisam-pirenena fa tena hisy tokoa io fifidianana amin’ny volana may 2013 io. Tsy mitsahatra mandriaka anefa ny rà manerana ny Nosy; faty atsy faty eroa ary amin’ny fomba feno habibiana tanteraka.
Ity krizy iray ity no nahitana famoizan’aina be indrindra hatramin’izay nisian’ny krizy teto amin’ny firenena, ankoatra ireo olona matin’ny mosary sy ny aretina. Efa ny pesta avy izao no miverina mandripaka eny anivon’ny fiaraha-monina toa izay nitranga tany Andramasina. Ndrao dia tonga kosa ny fotoana hitrakan’ny Malagasy sy ny olom-pirenena tsy an-kanavaka? Tsy mendrika izao sôdôma sy gômôro iainany andavan’andro izao ireo vahoaka 20 tapitrisa niandrandra fanovàna sy fiainam-baovao isaka ny misy hetsi-bahoaka.
Tsy tsapan’ireo mpanao politika tia tena miady tombotsoa manokana ireto tokoa angamba izany fahorian’ny vahoaka izany. Amin’ny fomba ahoana no mbola hitohizan’izao rà latsaka saika isan’ora eto amintsika izao? Aza ny vahoaka mangiana noho ny fahasahiranany mitady izay hohaniny no jerena fa Andrianamanitra an-tampon’ny loha! Aoka izay ny rà latsaka, aoka izay ny fanaovana sorona ny aim-bahoaka.
Tomponandraikitra ao anatin’izany rehetra izany koa anefa ireo mpitondra fivavahana izay misara-bazana noho ny resaka politika sy “olona”. Mijoro ianareo ray aman-dreny ara-panahy fa tena very fanahy mbola velona ny Malagasy. Mandriaka indray ny rà e!