Singam-bolo !

05/01/2013

Fa nankaiza ilay kabary miezinezina nataon’ny filoha Rajoelina ny volana janoary 2009 teny Ivato, raha iny izy niverina avy tany an-dafy iny, mikasika ireo hainoamanjery nakaton’ny fitondrana Ravalomanana Marc ; ilay demôkrasia nodradradradraina nentina nandresen-dahatra ilay vahoaka mora fahanan-dalitra ? Firy tamin’ireo hainoamanjery nakaton-dRavalomanana Marc no nosokafan’ny HAT ary firy kosa no nakaton’ny fitondrana Rajoelina ?

Hiharan’ny tsindry hazolenan’ny mpitondra indray mantsy ny radio Free FM, namoahana didim-pitsarana sy fanapahan-kevitra avy amin’ny ministeran’ny Serasera. Matahotra mafy tokoa mantsy ny mpitondra fa hiverina eny anivon’ny sofin’ny vahoaka ny onjampeo 104.2, indrindra amin’izao ankatroky ny fifidianana izao. Tsy maintsy miroso amin’ny fifidianana ny firenena. Na mbola ny praiminisitra Jean Omer Beriziky na Maharante Jean de Dieu na “directoire militaire” no hitantanana ny firenena mandritra ny fe-potoana tsy maha eo amin’ny fitondrana ny filoha Rajoelina. Raha tsy hoe angaha hilaza izay praiminisitra hotendren’Ambohitsorohitra eo na izay ho « directoire militaire » ho avy eo fa tsy mbola afaka manatanteraka fifidianana noho ny toe-draharaha ny firenena !
Tsy efa manana ireo kianja maro an’isa sy hôpitaly manara-penitra ireo ve ny mpitondra ka inona indray no mbola hatahorany onjampeo iray hifanehitra aminy mandritra ny fifidianana e ? Tsy efa ampy nandrenesan-dahatra ny vahoaka ve ireny tetikasa vao avy notokanana teo ireny e ? Ny hoe fifidianana Mora kosa aloha dia tsy hisy velively satria samy efa vonona amin’izany avokoa ireo kandidà nanambara ny filatsahan-kofidiany. Hadisoan’ny antoko hafa àry ve raha nahavita nametraka fototra any anivon’ireo fokontany, kaominina, distrika, Faritra ary Faritany izy ireo. Tsy avy amin’ireny antoko ireny velively no tsy nahavitan’ny TGV nametraka izany fototra izany.
Mahavariana tokoa raha onjampeo tokana toa ny Free FM no lasa mpifanandrina goavana indrindra ho an’ny mpitondra fanjakana vao avy nitokana zava-bitany amina miliara avy amin’ny volan’ny Wisco. Tsy mba menatra ve ny mpitondra eo anatrehan’izany rehetra izany? Lalatiana sy Fidèle ary Free Fm dia ampy hifanandrina amin’ireo hainoamanjerim-panjakana TVM sy RNM ary ireo gazetim-panjakana maniry ohatra ny anana! Izao ange izany no tonga amin’ilay fomba fiteny manao hoe: “singam-bolo mahalavo ny vosotra e!”