Zakanay e!

07/01/2013

Niakatra ho 200 Ar ny singan’ny sigara Boston, efa mananontanona ny 2.000 Ar (manao ezaka kely sisa) ny kilaon’ny vary, nikatra ny saran-dalana, manam-pikasana hanondrotra hofantrano ihany koa ny tompon-trano,… Tapitra miakatra avokoa ny zava-drehetra, eny hatramin’ny rano eny amin’ny arabe isaka ny avy ny orana, ny tosi-drà, sns.

Aoka hazava ny resaka, hoy ny fitenin’i Norbert Lala Ratsirahonana, na i Norbert I araka ny fiantsoan’i Big Max azy. Tsy ireo olona miady sy mitaky ny hisian’ny mangarahara, ny demôkrasia sy ny fahalalahana ary ny fanjakana tsara tantana, hataon’ny Fanjakana hazalambo velively no malaindaina amin’izany fiakaran’ny vidim-piainana izany. Mahita hohanina foana izy ireo, mianatra hatrany ny zanany ary mbola manana ny asa fivelomany ihany koa. Tsy ho azy ireo ny ady izay ataony sy hanenjehan’ny Fanjakana azy ireo fa ho an’ny vahoaka madinika nataon-dRajoelina sy ny forongony fitaovana sy sorona teny amin’ny kianjan’ny 13 may, maty sy naratra teny Ambohitsorohitra ny 7 febroary 2009, mba hatongavan’izy ireo teo amin’ny fitondrana.
Tsy ireo mitolona ho an’ny fahalalahana sy ny demôkrasia ary indrindra ny fanjakana tsara tantana velively no tandindomin-doza amin’ny pesta sy ny areti-mifindra amin’izao fahavaratra izao, fa ny zanaky ny ambany tanàna nataon-dRajoelina sy ny forongony ho toa ny vato natsindry nahazana. Koa raha miady ho amin’ny fampitsaharana ny krizy, ny fiverenan’ny fahalalahana sy ny demôkrasia ary ny fanjakana tsara tantana izy ireo, tsy ho azy ireo velively mihitsy no hanaovany izany fa ho an’ny firenena sy ny vahoaka Malagasy tsy an-kanavaka. Tokony hahatsiaro saina araka izany ireo vahoaka ambara ombieny fa madinika sy eny ambany tanàna.
Fanamby teny amin’ny kianjan’ny 13 may ny taona 2009 ny ady amin’ny fahantrana, ny ady amin’ny kolikoly, ny ady amin’ny fitanilana amin’ny endriny maro samy hafa ary indrindra ny ady amin’ny jadona. Ireo no antoky ny Fampandrosoana. Miha mahantra lavitra ary noana lavitra noho ny tamin’ny andron-dRavalomanana Marc anefa ny zanaky ny ambany tanàna, taorian’ny taona 2009. Koa na hisondrotra hoatrinona aza ny vidim-piainana, tsy ireo izay mitolona ho an’ny Tanindrazana velively no hikaikaika amin’izany fa ireo madinika sy ny zanaky ny ambany tanàna izay tsy mbola nahita ny anjara masoandroany hatramin’izay nanaovana fitaovana azy ireo izay. Zakanay e!