Sambatra ny adala !

09/01/2013

Miha maro ireo olona lasa adala noho ny hamafin’ny fiainana. Tsy lahy, tsy vavy, tsy ankizy ary tsy olon-dehibe. Ao ireo miteny irery eny amin’ny arabe, ireo mandihindihy eny afovoan-dalana, ireo misaringo-boridamba eny rehetra eny. Mampalahelo satria maro amin’izy ireny no olona mbola nanana fiainana “ara-dalana” talohan’ny krizy 2009. Mbola hita amin’ny rantsan-tongony mihitsy hoe vao haingana no tsy nikiraroany; toraka izany koa ny fitafiana eny an-kodiny. Mampahonena ny mahita ireny olona resy tampoka teo amin’ny fiainany ireny noho ny sitrapon’ireo mpanao politika. Saingy izao, toa izy ireny sisa no sambatra amin’izao fotoana izao.

Lavitry ny olana tsy maintsy sedrain’ireo “tsy adala” sy ny mihevi-tena ho salama saina izy ireo. Tsy mieritreritra izay faktioran’ny Jirama, ny saram-pianaran’ny ankizy, ny hofan-trano, ny fiakaran’ny vidin-tsolika sy ny saram-pitaterana, ny vola hamidy sakafo, ny fifidianana sy ny fodian-dRavalomanana na tsia, ny filatsahan’i Andry Rajoelina, lavitry ny tebiteby noho ny asan-jiolahy, ny jadon’ny mpitondra, ny fisamborana sy ny famonjana, sns. Sambatra ny adala lavitr’izany rehetra izany ary izay mihitsy angamba ilay fanovàna nampanantenain’ny HAT fony mbola teny amin’ny kianjan’ny 13 may ny taona 2009 e!
Ny mahavariana fotsiny dia ny hoe: “nahoana ny “tsy adala” no manaiky izany fampahoriana sy fahantrana azy izany? Nahoana ny salama saina no mangiana manoloana izao loza mitatao amin’ny firenena izao?”. Tena mbola salama saina marina tokoa ve isika Malagasy sa efa adala lavitra noho ireo heverintsika ho adala? Sa isika izao no antsoina hoe adala manan-tsaina, ohatra an’i Mbola amin’ny hiran’ny tarika Mahaleo?
Miaina anaty fahantrana lalina ny 44%-n’ny vahoaka Malagasy, araka ny tatitra navoakan’ny Banky Iraisam-pirenena farany teo; 8.800.000 no isan’izany vahoaka mahantra tsy manana fanantenana izany. Adala daholo ve izany vahoaka maro be izany, manaiky izao zava-misy izao sa efa lavitry ny adin-tsaina tahaka ireo adala mirenireny eny an-dalambe?