Ampy vovok’aina?

10/01/2013

Tsy mbola nisy mpitondra naneho fahasahiana tahaka ny filohan’ny Tetezamita, Andry Rajoelina, teto Madagasikara hatramin’izay 52 taona nahazoana ny fahaleovantena izay. Izy no filoha voalohany sahy namoaka vava be toa ireny ho an’ireo firenen-dehibe sy ny mpamatsy vola iraisam-pirenena. Raha mbola fahasahiana tsy misy toa ireny! Hatreto aloha tsy misy ny olana; saingy manana vovok’aina hiatrehana ny valin-kafatra ve?

Aleo tonga dia tsorina fa raha ny vahoaka efa trotraky ny fahantrana nandritra izay efa-taona nitondran’ny filoha Rajoelina izay tsy hanana vovok’aina hifampitaritarika aminy an’izay sitrapony. Toa tsy fantatry ny filoha akory aza fa mijaly sy mahantra loatra ange ny vahoaka noho izao krizy izao. Soa fa mba nisy ireo lehibena andrim-panjakana telolahy nihaiky izany zava-manjo ny vahoaka Malagasy izany. Koa aoka izay nanao izany ihany no hizaka samy irery ny vokatry ny naloaky ny vavany. Tsy manana vovok’aina amin’izany intsony re ny vahoaka ô! Efa tena rerak’izao krizy tsy misy farany izao ny Malagasy.
Ianareo mpitondra voky hatrany an-tendakely, manana ny ampy, tsy manan-java-maha ory no afaka hiatrika izany “ady” vaovao heverinareo hatao izany. Tolonareo samy irery izany fa tsy tolon’ny vahoaka Malagasy. Aoka tsy hialokaloka ao ambadiky ny Fiandrianam-pirenena ianareo amin’izany satria fantatr’ireo tsara fa tsy izay Fiandrianam-pirenena izay loatra no mahatonga anareo hifikitra eo amin’ny fitondrana fa ho an’ny tombotsoa manokanareo. Koa raha manana vovok’aina amin’izany “adinareo” izany ianareo, aoka kosa mba hangatsiatsiaka ny vahoaka. Ampy izay namarotanareo saka be loha ny vahoaka izay sy ny nanaovanareo sorona azy.
Koa samy ho tahian’Andrimanitra avokoa isika rehetra. Aleo ny tsy manana vovok’aina mitovy aminareo hiandry ao anatin’ny fanantenana feno izay ho anjara masoandroany fa ny Tompo tsy mba manary! Mazotoa mamaky ady etsy sy eroa fa be vovok’aina ianareo mianakavy.