Ataovy « et…et » e !

12/01/2013

Dia lasa tsy re tsaika tahaka ny fanaony indray ny filohan’ny Tetezamita Andry Rajoelina ; io moa ilay antsoin’ny sasany hoe « fialan’ny Jiosy » e ! Lasa namonjy an’i Tanzania indray mantsy ny filoha Rajoelina, roa andro taorian’ilay kabary nampiteny ny moana teny Iavoloha farany teo iny, ka nilazany tamin’ny fomba mijaha fa tsy misy hatahorany izany fianakaviambe iraisam-pirenena izany. Tsy ireo firenena mampivady ny lahy samy lahy sy ny vavy samy vavy velively, raha fehezina no handidy azy amin’izay tiany atao. Tamin’ny anaran’ny Malagasy moa no nanaovany izany kabary izany na dia tsy mbola voafidim-bahoaka akory aza ny tenany.

Ny vava no tsy atao be, ny mamerina azy no tsy laitra ! Araka ny efa nambara teto ihany, tsy manana vovok’aina hiatrehana ny ady vaovao noho ny fitiavan-tsezan’ny mpitondra intsony ny vahoaka Malagasy. Izy ireo no mbola mihinana sy voky hatrany an-tendankeliny, manan-trano, tsy rototra amin’izay faktioran’ny Jirama, afaka mampiana-janaka. Efa ny vilany mihitsy no vaky fa tsy ny tako-bilany fotsiny, ho an’ny vahoaka madinika. Koa raha mbola mieritreritra ny haneho ny maha TGV azy manerana an’izao tontolo izao ny filoha Rajoelina sy ny forongony, dia aleo angamba izy ireo mitady kianja hafa hanaovany izany. Ampy izay efatra taona nanaovan’ny mpitondra kianja fialamboly ny firenena izay.
Manodidina ilay “ni…ni” indray mantsy izao ny adihevitra eto amin’ny firenena. Mahita hialana bala hanohizana ny Tetezamita sy ny krizy hatrany ireo mpitondra fanjakana. Inona no olana amin’izany, ataovy “et…et” indray tokoa rehefa tsy mety amin’ny filoha Rajoelina (ho to anie ny sitraponao) ilay “ni…ni” e! Izay sitrapon’ny filohan’ny Tetezamita mantsy no tsy maintsy atao eto amin’ity tanindrazana iombonana ity. Tiany hovitaina ny lalana mampitohy ny renivohitra sy ny seranam-piaramanidin’Ivato dia tsy maintsy hovitaina ao anatin’ny enim-bolana izany; mampiasa loha azy loatra kosa ny mikasika ny fisondrotan-karaman’ny mpiasam-panjakana dia nahilika tany amin’ny PM Omer Beriziky. Mpanjaka e! ka andao indray àry ny “et…et” no hoventesina rehefa tsy mety aminareo le “ni…ni” e! Ary raha mbola tsy mety indray izany dia ndao ny “ôyé…ôyé” no hiaraha-miredona.