Mandinika fa voky !

14/01/2013

Ka tsy hisy fifidianana ho vita amin’io volana may 2013 io raha izao fandehan-javatra izao. Mbola handinika indray mantsy hono ny filohan’ny Tetezamita, Andry Rajoelina. Izay no nambarany taorian’ny fiverenany avy tany Tanzania farany teo. Fa inona indray aloha no mbola nandehanany tany e? Fa angaha miraharaha sy matahotra ny fianakaviambe iraisam-pirenena indray ny filoha Rajoelina? Efatra taona izao ny krizy, efatra taona namono ny fiainam-pirenena sy ny Malagasy. Mbola handinika indray anefa ny filohan’ny HAT. Mbola fotoanan’ny fandinihana ihany ve izao e?

Voky hatrany an-tendakeliny marina tokoa angamba ny filoha Rajoelina matoa mbola manana fotoana handinihana. Ny voky ihany mantsy no afaka mandinika. Nianarana tany amin’ny ambaratonga voalohany ohatra ny hoe, mandinika ny omby rehefa voky, mandevona vilona ao an-kibony. Ao ihany koa ny ohabolan-drazana manao hoe: “raha noana ny kibo mivezivezy ny fanahy”, izany hoe tsy afaka mifantoka amin-javatra iray. Natokana ho an’ny voky irery ihany ny fahafahana mandinika ka dia nasehon’ny filoha Rajoelina mihitsy izany fahavokisany izany.
Tsy afaka hiandry izany intsony anefa ny vahoaka Malagasy izay tena noana tokoa ka tsy afaka ny handinika intsony. Tsy misy afaka hanery ny filoha Rajoelina handray fanapahan-kevitra kosa aloha e! Zony tanteraka ny mandinika; ny tenany rahateo koa voky tsara ka afaka mandinika. Fa mba ahoana ny amin’ireto vahoaka nampahoriana nanomboka ny taona 2009, ireo mpandraharaha voatery nanakatom-baravarana noho ny antony maro, ireo mpiasam-panjakana leon’ny fampanantenana poak’aty?
Ianareo irery no afaka mandinika satria tsy miasa saina amin’ny hofantrano, ny faktioran’ny Jirama, ny saram-pianaran’ny ankizy, ny sakafo, ny saran-dalana, sns. Aiza intsony no mbola hananan’ny vahoaka fotoana handinihana eo anatrehan’ny olana tsy maintsy hatrehany manomboka amin’ny fotoana hipoahan’io masoandron’Andriamanitra io? Mandinika fa voky e! Ary ataovy fandinihana manara-penitra!