Voalavo !

18/01/2013

Notsipahan’ny vondrona eoropeana sy ny SADC indray koa ny paikadin’ny filoha Rajoelina, ny amin’ny hanatanterahana ny fifidianana solombavambahoaka mialohan’ny filoham-pirenena. In-droa voakapoka sahala amin’ny voalavo araka izany ny filohan’ny Tetezamita : sady voa no lavo. Soa ihany fa tsy nilatsaka hofidiana ny filoha Rajoelina raha tsy izany dia in-telo nahita fahoriana tahaka ny voaloboka : sady voa, lo no boka ! Satria nahoana, sady tsy ho lany, very vola ary tsy hahazo « amnistie ».

Valo andro tokoa mantsy sisa dia ho feno efatra taona ny raharaha 26 janaory 2009. Miainga amin’ny zava-misy isika fa tsy mamorona na faly hiteny. Sazy mihatra telo taona no azon’i Lalatiana sy Fidèle namory olona an-dalambe izay niteraka fahasimban-javatra (publiphone efa tsy miasa intsony). Maherin’ny 500 ny isan’ny olona voalaza fa maty nandritra iny Alatsinainy Mainty iny; amina miliara maro dia maro kosa ny fahavoazana vokatry ny asa fandrobàna. Azo antoka araka izany fa fa tsy ho telo taona tahaka ny sazy azon’ireto mpanao gazetin’ny Free FM ireto no miandry izay nitarika ny olona hidina an-dalambe tamin’iny 26 janoary 2009. Hatreto aloha dia ny filoha Rajoelina no ananana porofo fa niantso ny olona hidina an-dalambe ary nanome tso-drano ireo olona nihazo an’Anosimpatrana, tobin’ny radio MBS teo aloha.
Sady voa no lavo ohatra ny voalavo ankehitriny ny filoha Rajoelina: sady tsy mahazo milatsaka no mbola notsipahan’ny vondrona eoropeana sy ny SADC indray koa ilay tetika manodidina ny fifidianana. Dia inona intsony moa izany ny antny tsy maintsy mbola hijanonan’ny filohan’ny Tetezamita eo? Efa tsy to teny intsony eo anatrehan’izao tontolo izao intsony ny tenany. Tsy haleony dieny izao dia miverina ho olom-pirenena tsotra fa tsy hiandry firy volana! Hitombo indray mantsy izay efa mihavosa any ambadika any.
Fa mirongatra tokoa ny voalavo amin’izao fotoana izao vokatry ny loto manerana ny tanàna. Mirongatra toraka izany koa ny aretina pesta. Ny aza mba voalavo ihany fa ireny no tena fahavalom-bahoaka! Izay indray aloha no tafa sy dinika azo naroso ho anareo mpamaky androany.