Maty an-kazo tokana e !

19/01/2013

Marary an-doha avokoa ankehitriny na ny antokon’ny filoha teo aloha Marc Ravalomanana na ny an’ny filohan’ny Tetezamita Andry Rajoelina. Tratran’ny areti-mamindran’ny antoko nifandimby teto tokoa mantsy ny TIM sy ny TGV. Ho fanohanana sy fanompoana olona iray no antony nananganana ny antoko. Vao tsy nilatsaka izy mirahalahy dia kenda avokoa ny antokony: tsy mahita olona hasolo an-dRavalomanana Marc ny TIM; tsy manana olona handimby an-dRajoelina ny TGV. Ity farany aza moa hatramin’izay efatra taona nitondran’ny mpanorina azy izay tsy nahavita nametraka ny fototra (base) mihitsy. Hanao konresy tsy ho ela hono izy ireo hamaritana sy handaniana izay kandidà hatolotra na hotohanana amin’ny fifidianana.

Raha mba ny fifidianana filoham-pokontany tokoa mantsy no nambaran’ny filoha Rajoelina fa hatao mialohan’ny solombavambahoaka sy ny filoham-pirenena, dia mety azo noheverina fa manana kandidà matanjaka tokoa ny antoko TGV, toa an-dry Lanto Rakotomavo sy Naivo Raholdina. Saingy filoham-pirenena no resaka; izay rahateo koa no fanapahan-kevitry ny fianakaviambe iraisam-pirenena. Koa rehefa sahirana mafy mitady izay hasolo an-dRavalomanana Marc sy Andry Rajoelina ny TIM sy ny TGV, maninona raha ny Rév Ndriamanampy sy Annick Rajaona no hatolotra e! Ny voalohany efa nisora-tena ho ben’ny tanànan’Antananarivo; ny faharoa kosa avo lenta amin’ny resaka ara-diplômatika. Inona no olana?
Mahavariana tokoa fa misolotena olona iray ny antoko politika eto amintsika: ny AREMA an’ny amiraly, ny TIM an-dRavalomanana, ny TGV an-dRajoelina, ny AVI an-dRatsirahonana, ny FANAVAOZANA an’ny fianakaviana Andriamanjato, ny RPSD Vaovao an’i Voninahitsy, sns. Tsy mety mahatsapa izany mihitsy anefa ireo mpomba azy ireo ary izay no tena mbola mahavariana lavitra kokoa. Tsy misy mahazo mandimby ny mpanorina izany mihitsy ka na efa tsy afaka intsony aza dia mbola iny ihany no tompon’ny teny farany. Maty an-kazo tokana e!