Mariônety !

22/01/2013

Kandidà filoham-pirenena amin’ny taona 2018 indray hono ny filohan’ny Tetezamita, Andry Rajoelina. Zava-baovao ve izany ? Toa efa nambaran’ny RFI ihany mantsy io daty 2018 io raha tsy diso ny fitadidiana. Voalazan’ity hainoamanjery vahiny ity tamin’izany fa ny ministra frantsay misahana ny Raharaham-bahiny, Laurent Fabius, no nanondro io daty io tamin’ny filoha Rajoelina. Izany hoe, tsy ny filohan’ny Tetezamita no tompon’ny fanapahan-kevitra fa mbola ry zareo Frantsay, kanefa midradradradra fatratra ny Fiandrianam-pirenena. Samy hafa mantsy izany hoe manana ny fiandrianany sy ny mariônety izany!

Nohevererina fa sangisangy fotsiny ireny resabe re ny taona 2012 ireny. Nandeha mantsy ny feo fa hosahirana ny HAT raha vao tsy lany ho filohan’ny Repoblika frantsay eo i Nicolas Sarkozy. Ity farany mantsy no voalaza fa nanampy azy nandritra ireny zava-nitranga ny taona 2009 ireny. Toa marina anefa izany ankehitriny, tsy nahazo laka teo imason-dry zareo frantsay intsony tokoa ny filoha Rajoelina. Zara raha nisy 15 mn aza hono ny fotoana nandraisan’ny ministry ny Raharaham-bahiny frantsay azy nandritra ny fandalovany tany. Moa va tsy mariônety ity filoha manao tsianjery ny Fiandrianam-pirenena isaka ny mandray fitenenana ity?
Amin’ny 2018 indray izany mifankahita e! Ny amin’izao fotoana izao aloha no tokony horesahana. Inona ihany no mba vahaolana homen’ny fitondrana manoloana ny fahantram-bahoaka, ny tsy fandriampahalemana ary ireo olana ara-tsosialy maro nandritra izay efatra taona nitondran’ny HAT izay? Horaikitra ihany ve ny fifidianana amin’ny 8 may 2013; fifidianana filoham-pirenena sa solombavambahoaka no handeha mialoha? Izany izao no hiasan’ny sain’ny olona fa tsy fifidianana mbola amin’ny taona 2018. Hita mihitsy fa tsy miraharaha izay manjo ny vahoaka ireto mpitondra ireto; ny sezany sy ny tombotsoany ihany no maha vaky ny lohany. Milaza tena ho tia tanindrazana sy sarotiny amin’ny Fiaindrianam-pirenena kanefa mariônetim-bazaha tsotra izao!