Hiova famindra ?

23/01/2013

Zava-dehibe tokoa raha tanteraka araka ny tokony ho izy ilay fihaonamben’ireo kandidà filoham-pirenena izay hatao etsy amin’ny Hotel Panorama androany. Sambany teo amin’ny tantaram-pirenena no hisy an’izany mpifaninana miara-midinika sy miara-mandray fanapahan-kevitra ho an’ny firenena izany. Hatrizay mantsy dia mpifahavalo ireo kandidà ; izay mandresy manapotika ny resy, ny resy ksoa mikaroka hevitra hanonganana sy hanakorontanana.

Krizy firy izay nandalovan’ny firenena izay ary nisy hatrany ny aina nafoy sy ny rà mandriaka, ankoatra ny fampidirana am-ponja sy ny fanaovana hazalambo. Dia izao hiaraha-mahita izao ny vokany : fahantrana, ady an-trano, tsy fisian’asa, tsy fisian’ny fandriampahalemana, vonoana olona, korontana, sns. Maro amin’ireo mpanao politika antsoina amin’ny anaram-bositra hoe dinôzôro no mbola tavela ao anatin’izany endrika fanaovana politika mamohehitra izany. Velom-panontaniana eo anatrehan’izany ny olom-pirenena : mbola hahay hanova famindra ve ireto mpanao politika mitonona ho tia tanindrazana sy mikatsaka ny tombotsoa ambonin’ny firenena ireto ?
Ireo dinôzôro politika mihitsy no olan’ity tanindrazana iombonana ity. Ho azy ireny mantsy ny antoko iray dia midika ho ny tenany sy ny ankohonany. Toa ny areti-mifindra anefa izay fomba fanaovana politika izay; maro amin’ireo antoko zandriny no namerina ara-bakinteny ny fomba amam-panaon’ireo dinôzôro. Ohatra amin’izany ny antoko TIM izay tsy manana mpandimby ka voatery mifikitra amin’ny filoha teo aloha Marc Ravalomanana. Niana-desona teo no ho eo koa anefa ny TGV izay manana olona afatsy ny filohan’ny Tetezamita, Andry Rajoelina.
Fanompoana olona, izay no azo handikana ny fanaovana politika eto amintsika. Mila manova famindra amin’izay ireo mpanao politika raha tena manana izany fitiavan-tanindrazana marina izany. Tranom-borona no vitan’ny vava; tsy an-tendro molotra fotsiny koa no nandraisan’ny vahoaka ilay Fanovàna teny amin’ny kianjan’ny 13 may ny taona 2009.