Ho aiza ihany ?

25/01/2013

Efa an-jatony ireo olona notànana am-ponja noho ny halatra taolam-paty; an’arivony kilao koa ny taolam-paty voaroba tany am-pasana, tsy misy afaka mitondra fanazavana manodidina ity raharaha mamohehitra sady mampalahelo ity anefa ny manampahefana. Vokany, honohono sy tsaho sisa no tonga any am-poto-tsofin’ny vahoaka : hanamboarana baomba atomika hono, ilaina amin’ny fikarohana siantifika avo lenta hono, anamboarana fitaovam-piadiana hono, sns.

Dia manao tohy vakana tokoa ny vaky fasana sy ny halatra taolam-paty manerana ny Nosy. Ireo taolan-dava mazàna no tena tadiavin’ireo mpangalatra taolam-paty ary eo indrindra no hipetrahan’ny fanontaniana tsy misy valiny tato anatin’izay roapolo taona nandrenesana azy. Matoa misy ny halatra dia misy izany aloha ny mpividy n any ampiasana azy. Fa nahoana no tsy vitan’ny mpitandro filaminana eto amintsika izay mitonona ho matihanina ny mitondra fanazavana hombam-porofo mikasika ity halatra taolam-paty ity sy ny ilàna azy?
Toa mijanona fotsiny eo amin’ny fisamborana ireo mpangalatra taolam-paty sy ny filazana izany amin’ny hainoamanjery fotsiny ihany mantsy ny mpitandro filaminana; tsy mahita havaly kosa rehefa hametrahana fanontaniana ny amin’izay mpanangona azy sy ny ilàna ireny taolambalo ireny. Izany hoe, misy raharaha tsy ho vitan’ny mpitandro filaminana eto amintsika na oviana mihitsy izany ny hitady ny marina momba azy.
Tsy ny resaka halatra taolam-paty irery ihany fa ao indrindra koa ireo raharaha goavana niteraka fifanolanana ara-diplaomatika toa ny raharaha Walter Arnold. Toraka izany ny raharaha Michaëla izay tsy maharesy lahatra ny mpanara-baovao mihitsy ny vokatry ny fanadihadiana. Ho feno efatra taona rahampitso ny raharaha 26 janoary, fotoana nandrobana sy nandorana an’Antananarivo. Dia sanatria koa ve tsy manana angom-baovao mikasika iny Alatsinainy Mainty iny ny mpitandro filaminana? Ho aiza ihany isika ity?