Zanatany !

26/01/2013

Milaza azy ho tsy baikon’izatsy na zaroa ny filoha Rajoelina kanefa saribakolin’ny Lafrantsa, miankohoka eo an-tongony mihitsy. Izao Fiandrianam-pirenena izao hatrany no tsy afaka am-bavan’ny filoha HAT kanefa zanatanin’ny mpanjanaka. Aoka ho fantatry ny vahoaka Malagasy fa ny minisitra frantsay misahana ny Raharaham-bahiny no nibaiko an-dRajoelina tsy hilatsaka raha tsy amin’ny taona 2018. Feno lainga loatra ny vavan’ny mpitondra eto amintsika. Vao novakian’ny filohan’ny antoko MTS, Roland Ratsiraka bantsilana fa volan’ny seranan-tsambon’i Toamasina no nanamboarana ny lapan’ny Tanàna sy ny lalàna ao an-drenivohitry Betsimisaraka fa tsy volan’ny mpitondra. Tena tsy menatra ny mandainga mihitsy ireto mpitondra ireto ary mihevitra ny vahoaka no dondrona sy bado avokoa.

Tsy saribakolin’ny Frantsay toa an-dRajoelina kosa aloha no hitondrana ity firenena ity. Mbola mahazo miverina amin’ny teniny ny filohan’ny HAT; aoka izy hilatsaka hofidiana filohan’ny Repoblika dia ho hitany tsara izany safidim-bahoaka izany. Tsy ho lany filoham-pirenena amin’ny alalan’ny fifidianana madio sy mangaraharaha izany Rajoelina, zanatany sady saribakolin’ny mpanjanaka. Tsy tokony hiteny ny Fiandrianam-pirenena intsony koa ny vavany; tsy olona tahaka azy velively no manana zo hitory fitiavan-tanindrazana sy Fiandrianam-pirenena.
Sarotiny amin’izany Fiandrianam-pirenena izany ve ny filohan’ny HAT dia vitany ny mitazam-potsiny ireo olom-pirenena lasibatry ny asa fandrobàna izay ny tenany izao no nitarika ny olona hidina an-dalambe ny 26 janoary 2009! Misakana ny famoahana ny marina sy ny fampiharana ny lalàna ve ny Fiandrianam-pirenena? Ndrao dia fiandrianan’ny mpanjanaka sy ny andevony kosa ity Fiandrianam-pirenena ventesina isaka izay mahatsiaro ity?
Tokony hifoha amin’ny torimasony ny vahoaka tsy an-kanavaka; mpanompon’ny mpanjanaka ve no ndeha hidradradradra fitiavan-tanindrazana sy Fiandrianam-pirenena! Ny filohan’ny HAT, Andry Rajoelina, no kandidàn’ny Lafrantsa amin’ny 2018. Mazava be ny hafatra nataon’ny minisitra frantsay, Laurent Fabius. Mbola an-kamantatra hatreto ny hisian’ny fifidianana amin’ny volana may 2013. Miandry fa…zanatany!