Mpitandroka voatandroka !

29/01/2013

Vola amina miliara no natokan’Ambohitsorohitra ho an’ny « opération Tandroka » ; ny filohan’ny HAT Andry Rajoelina mihitsy no nanatitra ireo mpitandro filaminana tany Betroka ary dia nanaovana dokambarotra izay tsy izy tamin’ny ny TVM sy ny RNM. Natsangana ny vamoiera manokana hisahana ny serasera sy ny filazam-baovao manodidina iny hetsika iny mba hafantaran’ny vahoaka ny « vaovao tena marina », araka ny filazan’ny mpitondra azy.

Niaraha-nahita anefa ny vokatra. Ilay Remenabila lehiben’ny dahalo nandravarava tany amin’iny Faritra Atsimo, anton’ny « opération Tandroka » iny, tsy hita popoka hatramin’izao ary mbola manohy ny asa ratsiny ihany. Ny filohan’ny Tetezamita irery ihany no nahita iny hetsika iny ho nahomby ; tereny ho fahombiazana avokoa moa izay zavatra nataony na dia hita izao aza fa nandamoka, tsy nandeha araka ny tokony ho izy.
Nihantsy ny fitondrana sy ny mpitandro filaminana mihitsy Remenabila sy ny ekipany. Porofon’izany ireo zandary sy miaramila ary pôlisy maty nandritra ny fifandonana tamin’ireo andian-dahalo mirongo basy sy fitaovam-piadiana mahery vaika. Nandray fepetra ny Foloalindahy ary nofidiana manokana mihitsy ny anaran’ny hetsika ka natao hoe « opération Tandroka ». Nalefa tany avokoa ireo vondrona manokana toa ny FIS, CFS, RAL, RTS. Tsy voasambotra mihitsy anefa Remenabila.
Tsy sanatria fandatsana ny Foloalindahy sy ny filohan’ny HAT fa ireo dahalo no mitandroka azy ireo ankehitriny. Izao no tonga amin’ny fitenenana manao hoe: mpitandroka voatandroka! Mandrava izay tsy izy ny dahalo ary saika manerana ny Faritra Atsimo. Isan’ny lasibatra amin’izany Amboasary, toeram-piavian’ny ministry ny Rano, Reboza Julien. Nambaran’ity farany fa izy tenany mihitsy no anisan’ny nangataka ny nandefasana ireo mpitandro filaminana tamin’iny “opération Tandroka” iny. Tapitra mitandroka ity fitondrana ity avokoa izay rehetra notandrohan’izy ireo tany aloha.