« Service patron » !

01/02/2013

Nanakatro-baravarana indray hono ny filohan’ny HAT Andry Rajoelina nandritra ny Filan-kevitry ny minisitra farany teo satria tsy nanaiky ny baikony sy ny sitrapony ireo mambra ao amin’ny governemanta. Mampahatsiahy ny lalao baolina kitra fony mbola zaza ny fihetsiky ny filoha. Entin’ny tompony mody ny baolina raha vao tsy mety aminy ny zava-misy eo ambony kianja. Sain-jaza loatra ity Rajoelina ity, tsy mahagaga mihitsy ny ministry ny Raharaham-bahiny frantsay raha nilaza taminy hoe: “vous êtes trop jeune!”.

Soa ihany fa tsy hilatsaka hofidiana ny filohan’ny Tetezamita; mety homeny baiko hangorona ny vata fandatsaham-bato koa mantsy ny Foloalindahy raha vao tsy ny tenany no mitarika mandritra ny fanisam-bato. Tsy maintsy ny tenany, izy irery ihany mantsy no manan-jo eo amin’ity firenena voahozona ity. Ny filoha Rajoelina no tian’ny vahoaka indrindra, ny filoha Rajoelina no tia tanindrazana indrindra, ny filoha Rajoelina no mahay mitantana indrindra, ny filoha Rajoelina no manana toetsaina mendrika indrindra, sns.
Mihoatra lavitra hono ireny zazakely midongy an-kanina ireny ny fihetsika ataon’ny filohan’ny Tetezamita. Fa ireto mambra ao amin’ny governemanta sy ny praiminisitra Omer Beriziky mihitsy no tena mahagaga sy mahavariana. Efa izany ve no anaovan’ny olona ny tena dia mbola manaiky ho lembenana hatrany. Aiza moa ny olona no tsy hieritreritra fa mpiray lisitra miara-misôsy ihany ny filohan’ny Tetezamita sy ny praiminisitra; vazaha mody miady e!
Im-piry izay feo mandeha ny amin’ny fahavakisan’ny fifandraisana eo amin’i Andry Rajoelina sy Beriziky izay fa toa fampandriana adrisa ny vahoaka fotsiny ihany. Samy eo am-pototry ny vola ny roa tonta ka malaina ny hiala eo amin’izany toerana izany. Mody takontakonana amin’ny ady izany fihinanana izany; mba menatra ihany ange izy ireo fa tsy hita moa izy ity. Tahaka ireny hanao inona ireny mihitsy ny PM nandritra ny fanendrena azy teo amin’izany andraikitra izany raha nilaza fa ny Tondrozotra irery ihany no “Patron”-ny. “Patron”-n’ny praiminisitra ve ny Tondrozotra dia any amin’ny filoha Rajoelina izy hanao “service patron”!