« De ahoana e ? »

04/02/2013

Miroso tsikelikely any amin’ny fandresen’ny filoha Andry Rajoelina ny toe-draharaham-pirenena. Fandresena satria mety tsy hisy tokoa ny fifidianana filoham-pirenena amin’ny volana may 2013. Ny fifidianana rehetra mihitsy no mety tsy hisy raha izao zava-misy izao no jerena. Ireo mitonona ho kandidà avy no tsy mahita hotenenina eo anatrehan’iny fanambarana nataon’ny filohan’ny Tetezamita iny. Tsy mbola vonona hiatrika ny safidim-bahoaka raha ny marina kokoa. Ny sasany mbola eo am-pitakiana vola amin’ny Sinoa sy Karana hanaovana propagandy; ny hafa indray efa mahafantatra izao fa tsy ho lany kanefa tsy maintsy misehoseho etsy sy eroa hahazoam-bola.

Mampametra-panontaniana mantsy ny fihetsik’ireo mitonona ho kandidà. Niantso fihaonana ho an’ireo kandidà rehetra ny antoko MAMIMI handraisana fanapahan-kevitra iombonan’ny rehetra; zara raha nisy tonga namaly ny antso teny amin’ny Panorama. Ny hafa kosa indray mbola miaraka mitokana zava-bita sy manohana ny propagandin’ny filoha Rajoelina amin’ny taona 2018, sns. Mampalahelo mihitsy ny mahita ireo mpanao politika eto amintsika mitonona lava ho tia tanindrazana ireto.
Mampanahy araka izany ny hisian’ny fifidianana mialohan’ny taona 2015. Toa hoe nangataka ny hanalavana ny fe-potoan’ny Tetezamita ho roa taona indray mantsy ny mpitondra, nandritra ireo dinika natao tany ivelany teo ireny. Izany hoe, any amin’ny taona 2015 isika vao tena hiroso amin’ny fifidianana. Dia hanao inona eto mandra-pahatapitr’izany roa taona izany? Izao aza efa tsy azo iainana intsony ny tsy fandriampahalemana, ny fahantrana, ny tsy fisian’asa ary indrindra ny fitontongan’ny toetsaina eny anivon’ny fiarahamonina. Samy manao izay tiany ary tsy misy manaja izany lalàna sy fitsipika izany intsony.
Mitodika any amin’ireo kandidà araka izany ny mason’ny mpanara-baovao: tena kandidà ary vonona ny hiatrika ny safidim-bahoaka ve ianareo ireo sa mbola paikady handrebirebena saim-bahoaka hangoronan-karena indray koa. “De ahoana e?”. Aoka tokoa aloha izay kely vovok’aina hikisaka avy hatrany e!