Mandry am-piadanana !

08/02/2013

Nitsingerina omaly ny datin’ny 7 febroary nampitatatata ny basy sy nampandriaka ny rà teny Antaninarenina ny taona 2009. Tsy azo kosehina eo amin’ny tantaram-pirenena, tahaka ny vono moka nataon’ny FRS, ny raharaha kung-fu, ny diabe teny Iavoloha, ny fifamonoana teo amin’ny samy Malagasy tany Atsimo ny taona 1971, ny fifandonana teo amin’ny Zanadambo sy ny milisy ny taona 2002 io datin’ny 7 febroary io. Tsy midika akory izany fa izay mankalaza azy no manana ny marina; eo indrindra no ilàna Fitsarana azo antoka sy mahaleotena, hamoaka didim-pitsarana amin’ny anaran’ny vahoaka Malagasy.

Efatra taona izao no namoizan’ny ain’ireo mpiray tanindrazana am-polony maro teny Antaninarenina. Mampalahelo fa tsy mba havelan’ny mpanao politika handry am-piadanana mihitsy ny fanahin’ireo izay lavo noho ny fitiavan-tanindrazana nanohitra ny jadona. Tsy azo lavina fa noho izay hetahetam-pahafahana izay no hery nanosika ireo vahoaka niakatra teny Antaninarenina. Ankehitriny, avo roa heny noho ny tamin’izany fotoana izany ny jadona iainan’ny vahoaka. Ny Hitsikitsika nivavahana no lasa papango nipaoka ny zanaka akoho.
Lalaovin’ny sasany ary ataony fitaovana politika hanamafisana orina ny sezany sy ny tombotsoany izany rà latsaka izany ankehitriny. Ny maty tokoa tsy miteny. Mety mba manana ny heviny manoloana ny zava-misy eto amin’ny firenena mantsy ireo izay nanao sorona ny ainy ho amin’ny fanovàna ireo. Saingy indrisy, toa zaran’ny sasany aza nisy azy ireo handiovan-tena eo anatrehan’ny tantara.
Aoka izay! Homeo fialan-tsasatra ny fanahin’ireo mpiray tanindrazana maty noho ny fitiavan-tanindrazana. Aoka izay ny fampiasana ny ràn’ny mpiray tanindrazana ho fitaovana politika hiarovan-tseza sy tombotsoa! Aoka izay ny fanaovana mizana mitanila; mba marary amin’ny fianakaviany koa mantsy ireo havany maty sy tsy hita popoka nandritra ny Alatsinainy Maty ny faha-26 janoary 2009.