Hafa indray iny !

09/02/2013

« De gag ela ! », hoy ireo mpanentana tao amin’ny Free FM. Tsy misy tia tanindrazana mihoatra noho ny filohan’ny HAT eto Madagsaikara, araka ny nambarany teny Antaninarenina ny alakamisy lasa teo. Fitiavan-tseza avokoa hoy ihany ny filoha Rajoelina no mibaiko ny sain’ireo mpanao politika eto amintsika. Loza izany raha fahasahian’izay olona! Tsy mba mijery fitaratra mihitsy angamba ity filohan’ny Tetezamita ity ka tsy mahita ny tenany. Izy tenany sy ny manodidina azy anefa no tena mivavaka amin’ny seza raha samy mpanao politika. Efatra taona ange izay no naha teo amin’ny fitondrana an-dRajoelina; sady tsy voafidim-bahoaka no tsy mieritreritra ny hiroso amin’ny fifidianana hivoahana amin’izao krizy izao.

Inona moa izany no antsoin-dRajoelina hoe fitiavan-tanindrazana e? Fampiasana ho fitaovana politika ny ràn’ireo mpiray tanindrazana maty ho fanoherana ny jadona sa ny tsy firaharahiana ireo maty vokatry ny hetsika notarihany teny an-dalambe? Ity resaka rà latsaka ity hatrany mantsy no ambetin-dresaky ny mpitondra. Koa raha tena tia tanindrazana tokoa àry ny filohan’ny HAT, maninona raha homeny baiko ny Fitsarana sy ny mpitandro filaminana hanokatra fanadihadiana sy hitsara ny raharaha 26 janoary?
“De gag ela!”. Izao fahoriana tso roa aman-tany iainan’ny vahoaka Malagay izao ve no antsoin-dRajoelina hoe fitaivan-tanindrazana sy fiandrianam-pirenena? Tsara ho an’ireo kandidà ihany koa e! Aiza ka Rajoelina ve no miteny hoe ny fifidianana solombavambahoaka no hatao mialoha satria tsy afaka milatsaka ny tenany dia nangiana avokoa ireo kandidà 12! Tsy atokisan’ny TGV sy Ambohitsorohitra indray koa ny filohan’ny CENI-T satria tsy nanaraka ny sitrapon’izy ireo dia tadiavina hosoloina. Samy manana ny ataony hoe fitiavan-tanindrazana ary samy manana ny antsoiny hoe fiandrianam-pirenena. Izay indray izany no malaza e! Tsy misy tia tanindrazana ireo kandidà 12 ireo. Hafa indray iny!