Ady an-trano !

16/02/2013

Raikitra tokoa ny ady an-trano sy ny korontana araka ny nambaran’ny filohan’ny HAT, Andry Rajoelina. Ny anivon’ireo mpomba azy ihany anefa no tratran’ity aretiman-doza ity noho ny fitiavan-tseza sy voninahitra. Tsy ankasitrahan’ny TGV toa an-dry Lanto Rakotomavo sy Nirhy-Lanto Andriamahazo mantsy ny filatsahan’ny jeneraly Camille Vital ho kandidà amin’ny fifidianana filoham-pirenena. Hatreto aloha, raha ny angom-baovao azo, dia ity manamboninahitra ity no toa hoe nahazo ny tsodranon’ny filohan’ny HAT.

Efa hatry ela anefa no nandrenesana ny fiomanan’ny VPM Hajo Andrianainarivelo, hirotsaka ho isan’ireo mpihazakazaka amin’ny Repoblika faha-IV. Miombon-kevitra amin’izany koa ireo tompomenakely, indrindra ireo mpanao politika avy amin’ny antoko TGV, izay tsy mbola nahavita nametraka ny fototra any amin’ireo kaominina sy distrika nandritra izay efatra taona nisian’ny krizy izay.
Tsy vaovao loatra ary efa nampoizina mihitsy izao ady an-trano eo anivon’ireo mpomba an-dRajoelina. Samy mihevi-tena no mahay sy tian’ny filoha ary mahazaka vahoaka daholo. Efa hatry ny ela no nisian’ny ady mangatsiaka teo amin’ireo manodidina ny filohan’ny Tetezamita. Nivangongo tao Ambohitsorohitra hatrany mantsy ny fahefana. Tsy nisy afatsy ny SGP Haja Resampa, ny VPM Hajo Andrianainarivelo ary ny ministry ny Harena an-kibon’ny tany teo aloha, Mamy Ratovomalala, Annick Rajaona sy Ratsirahonana Norbert Lala no tompon’ny fanapahan-kevitra. Niditra ho isan’ny ekipa ihany koa ny ministry ny Serasera Harry Laurent Rahajason, lehiben’ny jadona sy ny fampihorohoroana mpanao gazety nandritra ity Tetezamita ity.
Izao vao mipoitra ny tena marina fa tsy ny vondrona telo avy amin’ny Ravalomanana Marc, Zafy Albert ary Didier Ratsiraka velively no antsoina hoe “alliance contre nature” fa ireto mpomba an-dRajoelina miady an-trano noho ny fitiavan-tseza sy voninahitra ary vola ireto. Tohizo ao ny ady an-tranonareo mianakavy e!