FFM, ho faty an-karanany

18/02/2013

Mbola tsy nandray ny asany akory ny Filankevitra Fampihavanana Malagasy (FFM) dia efa tototry ny fanakianana avy etsy sy eroa. Porofo ilazana fa rafitra ho faty an-karanany ity vao natsangana ity satria na mitombina na tsia ireny fanakianana ireny dia tsy maintsy hisy akony amin’ny fomba fiasan’ity andrim-panjakan’ny tetezamita ity izany. Iray amin’ireo hanomezan-tsiny ny rafitry ny FFM ny fahitana fa mbola ireo olona izay mpikambana ao aminy, araka ny fanendrena izay nankatoavin’ny filankevitry ny minisitra farany. Tsy vitsy tamin’ireo olona izay efa nolavina tamin’ny fanendrena teo aloha no mbola voatendry ao amin’ny FFM indray. Maro tamin’ireo voatendry ihany koa no voalaza fa tsy fantatry ny mponina tany amin’ny faritra nanendrena azy akory.

Ohatra azo tsapain-tanana no nataon’ny mpanara-maso ny raharaham-pirenena izay nanazava ny heviny tamin’ny faran’ny herinandro teo. Nambaran’ity mpandinika ity fa ny Fampihavanana no andraikitra hiantsorohan’ireo mpikambana ao amin’ny FFM. Moa ve afaka hampihavana nympanao politika eto Antananarivo ireo olona notendrena hisolotena ny faritra Analamanga ao anatin’izany rafitra izany ?, hoy ny fanontaniana napetrany. Iza hoy izy no mpanao politika ho azon’i Pastora Nestor Razafindramanitra hampihavanina eto Antananarivo ? Torak’izany ny ao amin’ny faritra Vakinankaratra : afaka mampihavana ireo mpanao politika ao antampon-tananan’Antsirabe ve I Lalao Randriamampihonona izay isan’ny olona misolotena ny faritra Vakinankaratra ao amin’ny FFM ? hoy hatrany ny fanontaniana napetrany. Nasongadiny ihany koa ny tsy fananan’ny ankamaroan’ireo mpikambana ao anatin’ny FFM vao notendrena ireo ny toetra tsy momba ny atsy sy ny aroa, raha tsy hilaza afa-tsy ny avy ao amin’ny Ray amandreny Mijoro izay efa hita mibaribary fa naira-dàlana hatrany tamin’i Andry Rajoelina hatramin’ny niandohan’izao krizy izao.
Santionany amin’ireo antony ilazana fa ho faty an-karanany ny FFM ireo natsidika ireo. Antony ihany koa ilazana fa mbola tsy vonona ny hampiala an’i Madagasikara amin’izao krizy ny mpitondra amin’izao fotoana izao. Resaka fiatsaram-belatsihy fotsiny ny filazana fa maika ny hamarana ny tetezamita izahay. Ny mifanohitra amin’izany aza no tian’izy ireo apetraka. Satria ny tsy fahatanterahan’ny fametrahana ny fitoniana sy ny fampihavanana noho ny tsy fisian’ny rafitra azo antoka amin’izany dia hitondra krizy vaovao hafa indray eto amin’ny firenena.