« Gros bras » !

25/02/2013

Ahhhh ! Tena mampiteny ny moana tokoa ity tsy fandriampahalemana eto amintsika ity. Fanafihana iray, faty iray raha kely indrindra. Fanafihana mitam-piadiana namoizana ain’olona roa sahady no nitranga tato anatin’ny tapa-bolana latsaka kely. Tsy tenenina intsony ny zava-misy any Atsimo sy ny Faritra maro hafa. Fa iza loatra no manana tombotsoa amin’izany tsy fandriampahalemana hanelingelina ny fanomanana sy ny fanatanterahana ny fifidianana izany e? Misy matahotra hiatrika fifidianana ve eto amin’ity firenena ity sa tsy manana olona hatolotra hotsarain’ny vahoaka amin’ny alalan’ny latsa-bato e!

Raha izao mantsy ny zava-misy dia tsy hisy fifidianana ho vita izany amin’ity taona ity. Hiampy dimy taona araka ny fanirian’ny sasany ary efa nilokalokany eto tokoa ny Tetezamita. Aiza ny Foloalindahy sy ny mpitandro filaminana manoloana izao fahoriana tsy roa aman-tany iainan’ny vahoaka izao? tsy mbola ampy azy ireo ve ireny fanazaran-tena, nandrava mpanao fihetsiketsehana nitaky ny fahalalahana maneho hevitra sy ny demôkrasia ireny e? Tokony ho mora amin’ny Tafika sy ny Foloalindahy mihitsy ange ny mandrava ireny andian-jiolahy sy andian-dahalo ireny. Raha mbola fanazaran-tena ve nisy mihoatra noho ireny fandravana mpanao grevy ao anatin’ny firy segondra ireny?
Ahhhh! Hita ny vahaolana! Tsy zoviana amintsika intsony ny fampiasana ireny “gros bras” ireny isaka ny misy fisehoan-javatra eto amin’ny firenena. Koa maninona tokoa raha izy ireo indray no karamaina hanampy ny mpitandro filaminana handrava ireo andian-dahalo sy fikambanan-jiolahy mpamphory vahoaka ireo e? Inona tokoa moa no maharatsy izany, ny tombotsoa ambonin’ny firenena no tsinjovina! Mba mety handray karama isam-bolana tahaka ny mpanao rugby ary mety hahazo kianja fikotranana manara-penitra kosa izy ireo, na mba mandray vola isam-bolana sy hananganana tsangambato ankalazaina isan-taona tahaka ny mpikambana ao amin’ny AV7.