Mandry tsara ve !

07/03/2013

Variana mitady izay vary iray loviany ny ankamaroan’ny vahoaka Malagasy. Fiteny fotsiny moa ny hoe mitady satria tsy mahita akory mandra-paharivan’ny andro. Any amin’ny mpitondra ny vola be! Raha somary nahoraka kely teo aloha teo ry zareo ao an-tampony ao, noho ireny fanambaran’ny jeneraly Camille Vital, dia nangingiana tahaka ny nahazatra indray avy eo raha tsy efa ravan’ny rivodoza ny Faritanin’i Toliara. Nanomboka teo indray dia nihazakazaka, TGV rahateo koa moa, nisehoseho tetsy sy teroa ary nidedaka ho hany tia tanindrazana sy mpanao politika manara-penitra tany amin’izay naleha.

Nampiasaina haingana ireo fotodrafitrasa tsy nety nahazo ny fankatoavan’ny vahoaka toa ny kianjan’Antsonjombe ary mety mbola ho avy koa ny kianjan’ny rugby. Saingy izao no mahavariana, naninona tokoa àry raha mba nampidirina tany amin’ireo hôpitaly manara-penitra ireo maratra sy marary tany Toliara?
Etsy an-danin’izany, nandatsa-drà indray koa ny HAT nandritra ny korontana niseho tany Mandritsara. Mpianatra roa no voalaza fa maty vokatry ny tifitra nataon’ny fanjakana. Hany ka niroso tamin’ny fikomiana tanteraka ny mponina tany an-toerana, nisakana sy nibahana ny arabe ary ny seranam-piaramanidina. Mbola misy sahy milaza ihany eo anatrehan’izany rehetra izany fa mandeha tsara ny raharaham-pirenena. Taiza no mbola nisy izany miaramila misambotra sy mitàna an-keriny ary midaroka olona izany, misandoka ny andraikitry ny mpitandro filaminana raha tsy nandritra ity fitondrana HAT ity! Tsy lazaina intsony ny tsy fandriampahalemana sy ny fanafihana mitam-piadiana izay efa mampiteny ny moana.
Mampalahelo fa mbola misy mahita maminy ary sahy milaza tsotra izao fa mendrika ny hitondra ny tany sy ny fanjakana ireto olona eo amin’ny fitondrana. Mbola misy ihany ireo minia mikipy sy mahita tory tsara amin’ny alina na dia efa mandry an-driran’antsy avokoa aza ny valalabemandry. Samy manana ny anjara vitany tokoa ny olona tsirairay avy; ao ireo mitaintain-dava noho ny hofantrano sy ny Jirama, ny hafa kosa milamindamina tsy misy toa izany. Mandry tsara ve?