Fitsarana !

15/03/2013

Fiantson’ny ankizy nanomboka tany amin’ny kilasy faha-7 isaka ny raikitra rombo rehefa mirava amin’ny 12 ora i Doda. Tovolahy tsy dia ahitan-teny firy izay izy ary tena natahoran’ny mpiara-mianatra noho ny tsanganany. Efa tamin’izany no nalaza teo amin’ny sehatry ny haiady i Doda ka nahatonga ny solon’anarany hoe Van Damme.

“Ura mawashi geri » mazàna no famaranany ny rombo ary dia nivoaka mpandresy hatrany isaka ny misy totohondry. Tehaka sy horakoraka ny an’ny mpiara-mianatra rehefa mahita ny mpifanandrina amin’i Doda misavoana eny an-danitra. Manavanana azy ihany koa mantsy ny fingana amin’ny tongotra, “ashi barai » moa no fiantsoan’i Doda io teknika iray io.
Fitsarana ! Rehefa nandinika ny Fitsarana dia mamoaka izao didy izao : « voalaza fa meloka ny voampanga, saziana izy noho izany hanao asa an-terivozona 15 taona sazy mihatra, noferana faran’ny ambany ny fanerena ara-batana,… ».
Voarohirohy tamin’ireny fanafihana mitam-piadiana teto an-drenivohitra ireny i Doda: banky, fiara mpitondra karaman’ny orinasa, tranombarotra, sns. Mpanao haiady avokoa ny telo tamin’izy 12 lahy saron’ny mpitandro filaminana niatrika ity fotoam-pitsarana ity. Nandà ny fiampanga hatramin’ny farany izy rehetra na teo aza ireo porofo sy fijoroana vavolombelona tsy nahafahan’izy ireo niala. Tadidin’ilay mpamily tapaka « mâchoire » nandritra ny fanafihana ilay fiara mpitondra volan’ny orinasa tsara tokoa mantsy ny tarehin’i Doda. « Io mihitsy ilay nitifitra totohondry ahy », hoy ilay mpamily teo anatrehan’ny Fitsarana.
Tsy dia ilain’ny fiaraha-monina eto amintsika tokoa angamba izany mpanao fanatanjahantena izany, indrindra ireo mpanao haiady na dia maro aza ireo sangany. Hafa ny any an-dafy. Ireo ankizy mpila vonjy tamin’i Doda, havanana teo amin’ny soratra sy ny asa-saina no tafita teo amin’ny fiainana. Tao ireo lasa DAF, DG, PDG amin’ny orinasa tsy miankina; ny hafa kosa lasa sefo sy tale any amin’ny Fanjakana; ny sasany indray lasa mpitsara ary ireo efa fatsora hatramin’izay moa lasa mpanao politika fanta-daza. I Doda sy ny « ura mawashi » kosa tsy nahita lalana afatsy tany amin’ny sehatry ny fiambenana (agent de sécurité), toa voahozona hiaro ny hafa mandritra ny androm-piainany.
Niharihary loatra teo amin’i Doda « ura mawashi » izany elanelan-tsaranga teo aminy ary ireto avara-pianarana mpiantso azy fony mbola tany an-dakilasy izany. Tamin’izay indrindra anefa no nilatsaka ny tolo-kevitra mety hampanam-bola haingana ary tena ilàna ilay talenta nampalaza azy sy nisalorany laza amam-boninahitra tany an-tsekoly.