Diso adiresy

19/03/2013

Maro amin’ireo mpamily fiara karetsaka eto an-drenivohitra no misafidy ny hiasa amin’ny alina, mandositra ny fitohanan’ny fifamoivoizana izay efa mampiteny ny moana tanteraka, vokatry ny fahasimban’ny lalàna rehetra eto Antananarivo. Efa mba miezaka manao izay takatry ny eo am-pelatanany ihany ny PDS, Edgar Razafindravahy, manampina ireo lavaka etsy sy eroa. Isan’izany i Rakoto mpamily taxi. Manofa fiara izy fa tsy tompony akory ary tsy maintsy manenjika 75.000 fmg isan’andro. Io moa ilay antsoin’izy ireo hoe “versement”. Tsy tahaka ny tany aloha anefa ny zava-misy amin’izao fotoana ; zara raha misy mivoaka amin’ny alina vokatry ny tsy fandriampahalemana. Ratsy noho izany ny fidiram-bola ; zara raha mahita « kil ».

Indray alina, nisy efadahy nisakana Rakoto teny amin’iny faritra manodidina an’i 67 Ha iny. “Location” hatramin’ny efatra maraina ka 250.000 fmg tsy miantoka lasantsy no nifanarahana. Nihazo an’iny Ambohimarina iny ny lalana. Nasain’ireo mpanofa taxi niandry azy teo amin’ny fiantsonan’ny “bus” ilay mpamily; izy ireo kosa niditra tany anaty tanàna. Ora iray latsaka kely taty aoriana, nivoaka avy tany izy efadahy ary nivimbina sakaosy sady niakatra ny fiara. Tsy lasa lavitra akory, mbola iny nidina ny sampanana Anosivavaka iny no indro nisy jiromangan’ny mpitandro filaminana nanenjika azy ireo avy taoriana. Nidina teny am-pandehanana ary nihazakazaka nandositra izy efadahy; taraiky irery teo kosa Rakoto sy ny taxi. Teo vao fantatra fa mpana fanafihana mitam-basy izy efadahy.
Valo volana no nijanonan-dRakoto tany am-ponja; nafahan’ny Fitsarana noho ny fisalasalana ny tenany, taorian’ny fotoam-pitsarana. Tsy nahafantatra izao vaovao tsara izao ny fianakaviany eny na ny vadiny. Efa ho dimy volana rahateo koa ity farany no tsy tonga nanati-bary teny am-ponja. Nilaza ho tsy salama loatra ramatoa tamin’ny fitsidihana farany nataony ary nanambara ihany koa fa tena sahirana mafy. “Aody e! Aody ô!”, hoy Rakoto nijaridina teo am-bavahady, gadra afaka e! Kinanjo vehivavy bevohoka no nitsena azy teo am-baravarana toa milaza aminy fa diso adiresy ny tenany. Maina sady kenda Rakoto; nanjary “fonja” faharoa ny fahitany ilay akany fahiny.