Volako manokana

21/03/2013

« Mirana ! Mandeha mody aloha ianao mandra-pandoan’ny mamareo ny écolage-nao. Teneno mamanareo fa tsy mahazo manao fanadinana hono raha tsy voaloa ny écolage ! ». Dia nangorona ny kahie sy ny kitapony ity zazavavikely vao valo taona, nivoaka ny efitrano fianarana sady nifokofoko nitomany noho ny henatra amin’ireo mpiara-mianatra. Saram-pianarana telo volana no tsy voaloan’ny ray aman-dreniny. Very asa noho izao krizy izao koa mantsy izy mivady, ny fiainam-pianakaviana mihitsy no potika sy rava tanteraka. Tsy hitan’ny mpitondra sady tsy iainany rahateo koa izany olana mianjady amin’ny ankohonana Malagasy izany. Izao “manara-penitra” izao ihany no masaka ao am-bavan’izy ireo.

Marary amin’ny ray aman-dreny izany mahita zanany voaraoka tany am-pianarana izany satria tsy nahaloa “écolage”. Ny tanimena tsy mirehitra hoy ny fitenenana, sahirana avokoa ny rehetra ka tonga amin’ilay fiteny hoe: “samy mandeha samy mitady!”. “Avia aty amin’ny neny, mangiana ny zanako. Efa lasa nitady vola handoavana ny écolage-nao any i dada”, hoy ity reny vonton’ny alahelo. Hitady vola aiza any amin’iza? Samy tsy misy valiny avokoa ireo fanontaniana ireo ary tsy hisy na oviana raha mbola izao fitondrana HAT mpambotry vahoaka izao.
“Ahoana ihany ny écolage-n‘ity zaza ity, tsy nisy mihitsy ve tany amin-dry mama. Mampalahelo ahy mihitsy le zanako!”, hoy Vero tamim-badiny. “Fa iza anefa no tsy malahelo e! Fa angaha vitan’ny malahelo izy ity, maninona ianao raha mba mitady solution fa tsy lany andro mitanisa ‘ze alahelonao any!”, hoy Setra namaly sady tezitra mafy. “Ka ‘za nge ry dada tsy mahazo manao fanadinana hoy directrice raha tsy voaloa ny écolage-ko e!”, hoy Mirana, nandetika ny fantsika efa mby teo an-dohan-drainy. « Fantatro ‘zany e ! Tsy mahay afatsy ny manome tsiny daholo ato an-trano ato ; tsy reniny tsy zanany ! », hoy hatrany izy niketoketoka an-janany.
Ora filazam-baovao indrindra anefa tamin’io fotoana nampifamaly azy telo mianaka io. “Ireo matoam-baovao: hotokanana tsy ho ela ny kianja fanaovana rugby, volan’ny filoha Andry Rajoelina manokana no hanamboarana ny tohatohabaton’Antaninarenina, sns”, hoy ny mpanolotra tao amin’ilay onjampeo. “Ny olona efa ho fatin’ny fahantrana sy ny fahasahiranana, mbola izany ihany no mahafaty ireto HAT ireto. Fa mba taiza koa anefa no nanany an’izany vola zany e?”, hoy i Setra nitazona ny teny ratsy tao am-bavany.