Finday !

23/03/2013

« Iza le Naina e ! Mivoaha tao ianao ! », hoy ny fitreron’ny sefo (izay dahaolo moa no fiantsoana ireo mpitandro filaminana ao amin’ilay kaomisaria). Nikatrokatroka tahaka ireny basy fahanana ireny ny feon’ny karetsaka be manidy ny « violon » nisy an’i Naina. Feno 48 ora tokoa mantsy no nitazonana azy noho ny fitoriana napetrak’ity rangahy mpiray vodi-rindrina aminy eny Ambohimanarina eny. Efa nampahafantarina taminy fa aorian’io fe-potoana io dia tsy maintsy hatolotra ny Fampanoavana ny tenany, araka ny voalazan’ny lalàna. Tsy izay anefa no zava-nisy fa nalefa nody ary Naina ary efa niandry azy teo ivelany ny vadiny. “Sendra olona tsara fanahy ialahy raha tsy izany efa nanateram-bary teny Antanimora amin’izao ora ‘zao”, hoy ilay “brigadier” taminy. Nanala ny fitoriany mantsy ilay rangahy araka ny fanazavana azony. Tsy nampiasa loha azy ny anton’izao fivoahana izao fa rehefa mivoaka fotsiny aloha dia izay no zava-dehibe.

Tsy nisy resaka firy nifanaovan’izy mivady teo an-tokontanin’ny kaomisaria, izay nialana haingana teo no masaka tao an-doha. Iray tapitrisa ariary no vidin’ilay finday voalaza fa nangalarin’i Naina. Mpiandry fiara amin’ny alina no asany. Adinon’ny tompony tao anaty fiara, araka ny fitoriana, ny finday avo lenta. Tsy tao intsony anefa izany nony maraina ny andro. Tany aminy avy hatrany no niantefan’ny ahiahian’ny tompona fiara, Tena tsy nangalatra ilay finday tokoa i Naina saingy tsy nahita havaly teo anatrehan’ny zava-nisy.
Mifosa azy mivady avokoa ny mpandalo sy mpiray tanàna. Tsara tarehy loatra mantsy ny vadin’i Naina ka sarotra amin’ny mpialona ny mahita ity zazavavindrano eny am-pelatanana mpiandry parking. Tonga soa aman-tsara tao an-trano vao sahy nametra-panontaniana tamin’ny vadiny izy: “nahita vola nanoloana ilay finday ihany angaha ianao?”. Tsy nisy valiny anefa izany. Nikasa hamerina hanontany izy kinanjo… Nazava taminy na dia tsy nety niloa-bava mihitsy aza ny vadiny ny fomba nanonerana ilay iray tapitrisa vidina finday.