Mamita-tena!

27/03/2013

« Maty… ! ». Nihoraka avokoa ireo mpandeha an-tongotra. Lehilahy iray no indro mitsarara eo afovoan’ny arabe mihosin-drà ny lohany. Maina tahaka ny kitay ny mpamily ny fiara nandona azy, toa very saina nandritra ny segondra vitsivitsy vao tapa-kevitra nivoaka. Ompa sy teny ratsy no ren’ny sofiny raha vao tafavoaka ny fiara, andian’olona maro ihany koa no indro mihazakazaka mitangorona manodidina ilay naratra. Ren’ilay mpamily tao anaty tabataba ny hoe “ndao hodorana ny fiara!”. Tsy nandingana in-telo akory izy dia efa andian-jatovo tsy fantatra fiaviana no manodidina ny fiarany.

Nikasa hiverina hanidy ny varavaram-pitaratra sy haka lakilen’ny fiara ilay mpamily. “Mitady ho aiza rangahy ianareo ‘zany a! Ilay olona ato vaky be ny lohany mbola ny fiaranareo ihany ve no maha maika anareo e!”, hoy ny eson-teny. Nandinika iray segondra teo ilay mpamily, navelany nanao izay tiany tao ireo andian-jatovo ka naleony nanatona nijery ilay maratra. “Ento any amin’ny hôpitaly ‘zao de ‘zao le maratra e! Tapitra eto koa ny ain’ialahy raha maty eo io!”, hoy ireo mpandranitra ady. “Tsy ampahafirin’izay manana fiara le aliakalahy ‘ty, fa angaha rehefa hoe madinika de atao an’zao! Tsy mihetsika eo io fiara io raha tsy ‘zany doranay!”, hoy indray kosa ireo mitonona ho mpiray tanàna tamin’ilay maratra. Nisakana taxi ny iray tamin’ireo mpitangorona ary dia nampidirina ny maratra. Tamin’izay indrindra no nisy niteny mafy hoe: “ndao harahana sao de mandositra any io e!”. Dia nirohotra niditra tao anatin’ilay taxi ny efadahy, tsy fantatra hoe havan’ilay maratra sa inona. Voatery nangiana sy nanaiky izay tian’izy ireo natao ilay mpamily.
“Ny permis-nao azafady”, hoy ilay brigadier. “Indreto tompoko”, hoy ilay mpamily. “Any ve ny assurance sy ny carte visite”, hoy ihany ilay pôlisy. “Eny tompoko! Inty ny carte visite, inty kosa ny assurance”. Nodinihan’ilay brigadier nandritra ny sgondra vitsy ireo antontan-taratasin’ny fiara vao nanohy ny fanontaniana izy: “ahoana ny fandehan’ny zava-nitranga? Nandeha mafy be hono ianao hoy ireo olona teo amin’ny manodidina”, hoy ity mpitandro filaminana. “Tsia tompoko, tsy nandeha mafy mihitsy aho. Nivembena be avy tany anaty bar tany ilay rangahy ary avy hatrany dia nitrosona teo anoloan’ny fiarako. Maimbo toaka be mihitsy rehefa teny ambony taxi ho any amin’ny HJRA izahay ary azo hamarinina eny amin’ny hôpitaly izany. Nisy nangalatra daholo ny findaiko miisa roa sy ny ordinateur portable ary ny vola sy ny entana rehetra tao anaty fiara.”, hoy ilay mpamily.
Asa tokoa raha mba azon’ireo mpamokatra zava-pisotro mahamamo an-tsaina toa ny Libertalia, Gold, THB, Skol, ny loza mitatao ho an’ny fiaraha-monina amin’ity fampimamoana olona ity. Mbola misy fanjakana ve eto amin’ity firenena ity sa fanjakan-jiolahy sy tontakely e? Ny fampimamoana vahoaka ve no vahaolana hivoahana amin’izao krizy izao sy hivahana amin’ny fahantrana? Ndrao dia mba mamita-tena e!