Vilian-tsahona !

28/03/2013

Fianakaviana maromaro no indro mandeha an-tongotra milanja vatam-paty mifono lamba fotsy efa vasoka, mizotra manaraka ny sisin’arabe. Midanika izay tsy izy ny masoandro, mifangaro ny ranomaso sy ny hatsembohana. Mbola lavitra ny dia sady tsy mba mahasarika ny mason’ny mpandalo tahaka ny kôrtezy marevaky ny mpanana rahateo koa.

Tazo mahery no nahazo ilay zaza vao dimy taona monja. Tao anatin’ny 48 ora no niadiany tamin’izany areti-mandoza izany, nanaiky ho resy ihany anefa tamin’ny ora farany. Efa natao avokoa ireo karazana hevoka araka ny toromariky ny manodidina: kininim-potsy, ranomena, sns. Hany foto-pisainana Malagasy sisa tavela eny anivon’ny fiaraha-monina ny fifampiresahana sy ny fifanomezana torohevitra rehefa misy marary, indrindra any amin’ireo faritra iva hivangongoan’ny fianakaviana sahirana. Tsy maintsy mifanampy raha ny marina kokoa.
Nojerem-potsiny, izay no azo hilazana ny ady nataon’ilay zaza teo anatrehan’ny aretina izay nandavo azy. Na ireo kininim-potsy natao hevoka aza mbola nangatahana taman’olona ary sisan-dranomena nanorana ny tongotry ny rainy folaka tany amin’ny baolin’ny fokontany no nasaly tamin’ny sotro vy mba hidonaka hameno ny efitrano. Very asa noho izao krizy izao izy mivady. Mpiambina tamina orinasa afaka haba ny lahy ary mpanao peta-kofehy kosa ny vavy. Ilay fidiram-bola zara raha nisy no mbola nesorina teo am-pelatanan’izy ireo. Tsy rariny!
Mpiara-dia amin’izy mianakavy ary tsy mahasaraka azy ireo mihitsy rafahantrana. Raha manonofy ratsy noho ny havokisana ny manan-katokona, izy ireo kosa tsy mahatsindry tsihy noho fandihizan’ny rivotra ao anaty kibo. Raha tototry ny vola famangiana sy ny voninkazo maro loko ary lambamena ireo mpanana, ny azy ireo kosa ny hira zafindraony no natao naredona ; nanakotaba ny torimason’ny mpiala sasatra indray aza. Nataon’ny mpiandry faty resaka nandaniana ny alina sy namitahana ny hanohanana ny hôpitaly manara-penitra. Malaza tsy hinanana tahaka ny vilian-tsahona!