Resabe !

02/04/2013

Iny telo andro tsy niasana nanamarihana ny fetin’ny Paska iny no naharesy lahatra fa « resabe » sy nofinofy izany fampandrosoana an’i Madagasikara izany. Ny vahoaka ao aminy no miantoka na tsia ny fampandrosoana ny firenena iray. Asa ny any amin’ny faritany fa raha ny zava-nisy hitan’ny maso teto an-drenivohitra sy ny manodidina dia mampiteny ny moana.

Misy karazan’olona manahirana eto amin’ity firenena ity ary tsy ahafahana mametraka izany politikan’ny fampandrosoana izany velively. Toa olona natao hanakorontana, handika lalàna, hisetrasetra, handroba ary nobeazina ho amin’izany mihitsy. Fahafinaretan’izy ireo mihitsy ny mandeha eny afovoan’ny arabe, mibahana tsotra izao ny fiara sendra azy ireo. “Klaxon” tokana monja dia mety hahatonga ady saritaka hanapotehana ny fiaran’izay nampaneno izany. Tsy vitan’izany fa mamo toaka sy mamon-drongony, tsy lahy tsy vavy ary amin’ny fotoana tsy ampoizina akory no mety hitrangan’ny loza vokatr’izany.
Izao anefa no tena mampalahelo ao anatin’izany rehetra izany. Misy mpanao politika mitonona ho tia tanindrazana mialokaloka ao ambadik’ireny karazan’olona ireny ary manome vahana azy ireo mihitsy. Azy ireo mantsy noho izao fitondrana izao ka afaka manao izay tiany atao. Tsy maninona, aoka ho azy ireo tokoa izao fitondrana izao ary tsy misy maniry hiara-dia ho lasa mpiray tsikombakomba amin’izao fitondrana izao rahateo koa. Mampalahelo raha mpanao politika mangasanga isaka ny miteny ny fiandrianam-pirenena no manosika ny vahoakany ho amin’izany fomba fiasainana sy fitondran-tena izany.
Ireny karazan’olona ireny ve no antsoina hoe vahoaka? Izao vao tena mivandravandra fa “resabe » izany hoe fampandrosoana an’i Madagasikara izany raha mbola misy andian’olona ataon’ny mpanao politika fitaovana hiarovany ny sezany, hangoronany ny harem-pirenena. Ireny karazan’olona ireny indrindra anefa no tena sahirana sy miaina isan’andro ao anatin’ny fahantrana lalina.