Ra-Jeannot

03/04/2013

Ho hitanao ato amin’ny KOF’ROC isan’andro ny tantaran-dRajeannot, tantara noforonina, hilazalazana ny fiaimpianan’ny ankamaroan’ireo olona very asa vokatry ny krizy, indrindra iny zava-doza nitranga teto an-drenivohitra ny datin’ny faha-26 janoary 2009 iny. Mampiseho ny fitontongan’ny fari-piainan’ny vahoaka Malagasy nandritra izay efatra taona nitondran’ny HAT ny firenena izay. Mampibaribary ny fahaverezan’ny hasina maha olona amin’ny ankapobeny ihany koa ny tantaran-dRajeannot. Mazava ho azy fa mifangaro ao avokoa ny hatezerana, ny halahelo, ny fihomehezana, ny fahadisoam-panantenana, sns.

Diabe manara-penitra
Mivoaka ny trano isa-maraina tahaka ny olon-drehetra ndeha hamonjy ny asa fivelomany Ra-Jeannot ary tsy tafody an-tanàna raha tsy any ambadiky ny amin’ny fito ora hariva. Mba lehilahy ihany tokoa mantsy ny tenany talohan’ny nahaverezan’ny asa aman-draharaha noho iny fandrobàna tsy misy Fitsarana ny faha-26 janoary 2009 iny. Mbola isan’ireo mpilahatra bus vao maraina Ra-jeannot, iray volana taorian’ny nikatonan’ny orinasa nampiasa azy. May kilan’ny afo raha ny marina kokoa. Nanjary hain-dRajeannot tsianjery taty aoriana kely ireo elakelan-trano sy farihy manivaka miala ny arabe. Miara-tonga amin’ireo mpitaingina taxi-be ihany anefa izy. Hiaraha-mahalala ny fitohanan’ny fifamoivoizana amin’izao fahasimban’ny lalana eto an-drenivohitra sy ny gaboraraka eny an-dalambe eny.
Raha mamonjy birao sy toeram-piasana ny maro amin’ireo mpitaingina taxi-be, Ra-Jeannot kosa mitety ireo magazay vao misokatra manerana ny Arcade Analakely sy Tsaralalàna, indrindra ireo tranombarotra Karana sy Sinoa. Tsy hampitovy vidin’entana tsy akory fa hitazana ndrao misy misoratra hoe “mitady mpiasa”. Mihazo an’i Behoririka indray avy eo rehefa avy niserana teny Soarano. Midina an’Andravoahangy indray avy eo sady mitopi-maso kely eny amin’ireo lohan-kisoa sy saosisy etsy amin’ny Look’s Ramasy na dia tsy nampiraika azy loatra aza izany tany aloha. Manohy ny diany mihazo an’i Mahavoky Ra-Jeannot rehefa avy niala sasatra kely teo amin’ny fiantsonan’ny bus. Mivoaka eny Besarety ary dia mihanika an’Antaninandro sy Ambondrona…. (Hitohy)