Ra-Jeannot

04/04/2013

Diabe manara-penitra (tohiny) Tsy misy fiovana ny làlan-dRajeannot; tsy misy fiovana toraka izany koa ny fanantenany. Efatra taona katroka izao no nanaovany io diabe manara-penitra io saingy tsy nahitam-bokany. Ny hany tokana nahitam-piovàna sady miova endrika isan’andro dia ny kirarony sy ny patalohany. Miha-mitongilana lava izao ny vodin-tongotry ny kirarony, indrindra ilay ilany havanana. Ilay diabe manara-penitra no fototr’izany! Mbola tsy afaka amin-dRajeannot ihany mantsy ilay famindra somary mibakabaka fanaony isaka ny miditra ny toeram-piasany. Miha-vasoka sy mangirana ihany koa ilay pataloha mainty fitondrany mamonjy fivoriana fony mbola “olona”. Sasàna haingana ilay pataloha raha vao migadona ao an-trano; pasohana avy hatrany ndrao tsy misy hanaovana ny ampitso. Tsy mampiasa izany “pattemouille” izany intsony Ra-Jeannot fa avy hatrany dia tairiny amin’ny fera vy; sosohana amin’ny kofehy mainty kosa izay faritra main’ny pitika saribao.

Milaza ho maika hatrany Ra-Jeannot isaka ny mifanena amin’ireo namany na ireo havany. “Mbola maika hamita iraky ny debanay aho fa mandra-pihaona !”. Iza moa no antsoiny hoe debany eo fa tsy ny masoandro milentika sy ny diabe manara-penitra miandry azy isaka ny hariva rehefa hamonjy fodiana! Niezaka nanafina izao zava-manjo azy izao Ra-Jeannot ary nitandrina tokoa teo amin’ny fitondran-tena. Mazàna hono mantsy rehefa mahantra sy ory dia toa lasa manana toe-tsaina mirefarefa amin’ny tany. Mpiady an-tsena na mpanao vavan’ny mpivarotra anana hoy ireo mpanakora ary anisan’ny mpifosa ireny olona miady an-dalambe ireny Ra-Jeannot fony mbola nandeha tamin’ny fiaran’ny orinasa rehefa manao “recouvrement”.
Ndeha hiampitany ny arabe iny indrindra anefa ny tenany no indro fiarakodia tsara tarehy lafo vidy iray nandona mpandeha an-tongotra. Nitangorona ny olona, samy niteny izay tonga tao am-bavany ireo mpandalo, toraka izany koa Ra-Jeannot: “f’angaha rehefa manan-karena leity dia mandona ny madinika a! Doranay eo ny tômôbilan’ialahy!”, hoy izy sady sempotra. Ra-Jeannot indray no nisolo toerana ny pôlisy mpandrindra ny fifamoivoizana, misakana ny fiara miakatra; mandefa ireo midina. Voninahitra ho azy ery ny mahita ireo mpamily manaiky ny baikony. Fahasambarana re izao!