Ra-Jeannot

05/04/2013

Diabe manara-penitra (tohiny) Tsy naharitra ela anefa ny fahasambaran-dRajeannot, nisolo toerana vonjy maika ny pôlisin’ny CUA. Efa izay mihitsy angamba ny anjarany eto amin’ity tany fandalovana ity. Vao niditra niasa enim-bolana tokoa mantsy Ra-Jeannot no nitranga ny fandrobàna ny datin’ny 26 janoary 2009. “Pi!Pi!Pi!Piiiii!”. Tezitra mafy ilay mpamily taxi-be, ny fiara midina hatrany mantsy no nalefan’ny “ramose pôlisy”. “Miala r’ilay tsy misy saina ity eo a! F’angaha ela pôlisy no misakantsakana eo?”, hoy ilay saofera. Nierikerika nijery ny manodidina azy Ra-Jeannot ka tamin’izany no nahatsapany fa toa mandatsa azy avokoa hatramin’ny daba-pako. Farany, nikisaka teny amin’ny sisin-dalana ity “ramose pôlisy” sady nanao faran-teny: “Ndehana manidina rehefa tsy faly leity e!”.

Lasa saina nandritra ny minitra vitsy teo an-tsisin-dalana Ra-Jeannot, nanontany tena hoe: “ho aiza moa zany izao ny lalako?”. Tsy misy maha samy hafa an-dRajeannot amin’ny jamba milomano ka izay hidonan’ny loha no hiakarana. Dia notohizany fotsiny izao ny diabe manara-penitra. Nidina an’i Faravohitra indray aloha ny tenany ary nanomboka tsapany fa miha malama izany ny ao anaty kirarony. “Hivovoha be indray zao ty rahariva”, hoy izy lokin’ny hehy. Ny fitandremana voalohany indrindra raisin-dRajeannot rehefa tonga io fotoana io dia ny miala lavitra izay toerana be olona. Fanaony mantsy ny maka aina eo amin’ny zaridainan’Antaninarenina rehefa mitatao vovonana. Mitsangana avy hatrany Ra-Jeannot raha vao misy olona hafa mipetraka eo akaikiny.
Mahavariana tokoa fa maha te hihinana izany daholo izay zavatra hitan’ny maso rehefa tsy ariary am-paosy. Milendalenda mihitsy Ra-Jeannot mahita ireo voanjo mihavosa efa miala hodiny. Tapa-kevitra ra-lehilahy fa hividy ka nanolotra ny vola ariary zato teny aminy sady nitsaingoka voam-boanjo iray sahady. Ny tombotsoa amin’ny voanjo dia noho izy azo hanina tsirairay dia mba mitsakotsako maharitra eo. Mahagaga ihany koa fa tsy maintsy misy voam-boanjo iray latsaka hatrany isaka ny mihinana azy itony. Ohatra ny tselatra ny fitsoriakan’ny tanan-dRajeannot nandroaka ilay voam-boanjo. Tsy misy zavatra verivery sy azo ariana izany tokoa eny an-tampon’ny samy reraka.