Ra-Jeannot

09/04/2013

Diabe manara-penitra (tohiny) Nisaraka tsy nisy naratra Ra-Jeannot sy Sidonie, samy mahantra rahateo koa e ! Tahaka ny vatoaratra ihany ny fiainana : ny miabo tsy afaka hivady amin’ny miabo, ny miiba mifandaka amin’ny miiba fa tsy maintsy « + » sy « - ». Izany hoe ny mpanana ihany no afaka mividy ny tsy manana. Teo koa vao nazava ny resaka. Tsy ny hitafa amin’i Sidonie na ny hotazan’ny mpandalo no tena naha maika an-dRajeannot hiala teo. Nanova ny fomba fijeriny sy ny fanantenany ny diabe manara-penitra nataony tato anatin’izay vola maro izay. Nitsiry tao aminy ny fitiavana te hanan-karena tampoka, maro rahateo koa ireo orinasa mpanararaotra izay fahalemen’ny Malagasy izany ka nampiasa ny volany hanambakana vahoaka. “Anaovy Peho ny Dimy iray, sa ataovy Loto e!”, hoy Ra-Jeannot tamin’ilay andriambavilanitra.

12,4,36,22... “Aleo rangahy soloina 9 ilay 4. Ny 9 mantsy mba isa masina”, hoy Ra-Jeannot niteny irery. Lasa ordinatera tampoka teo mihitsy ny lohan-dRajeannot. Tapitra nandalo teo imasony avokoa ireo tarehimarika rehetra. Nalahatry Ra-Jeannot tao anaty efajozo daholo ny daty manan-tantara fantany, ny daty nahaterahany, ny datin’andro, ny isan’ny mpiraitampo, sns. Niova indray anefa ny heviny. Fiarakodia efatra izao no nandalo teo anoloany ary samy nihafara tamin’ny laharana ..16 avokoa ny nomeraon’ireo fiara ireo. “Lasantsy daholo leisy ‘zany ry Jeannot lapin a!”, hoy izy nihomehy irery. Efa voavidy ilay tapakila no indro nandalo ity mpivarotra mofo baolina midorehitra mena sady manentoento. Tsy nisy afatsy ariary zato anefa tany aminy ka dia raikitra indray ny adin-tsaina: Gauloise sa mofo baolina? “Aleo rangahy sigara a! Rehefa mipoaka ny Loto tonga de misao aux crevettes sy profiterole any amin’ny Planète mihitsy!”, hoy Ra-Jeannot feno fanantenana.
Nanakotsako an-dRajeannot avokoa ny hihiny manontolo. Nisy rà mihitsy aza teo amin’ny vodin’ilay sigara. Taitra izy nijery izany ka nandrora tamin’ny tany. Indro tokoa fa nivadika ho mena ny lokon’ny rorany. “Tena midekals aho zany le!”, hoy izy kivikivy. Tamin’izay indrindra no nandalo ny kôrtezin’ny filoha Rajoelina, nanakoako tahaka ny feom-tsaobakaka ny anjombon’ireo fiara mpitondra ireo mpiambina. “Aiza le vary dimanjato sy le menaka 12.000 fmg e! Maninona raha hamidy any koa le Airbus hividianana vary fa noana ny vahoaka !”, hoy izy nihorakoraka tery am-pita.