Ra-Jeannot

10/04/2013

Diabe manara-penitra (tohiny) Amin’ny enina ora eo ho eo izay! Efa ora fodian-dRajeannot rahateo koa na dia tsy mitovy aza ny zavatra hovantanina any an-trano. Tsy mba hitan’ny tranobongo feno fahantrana an-dRajeannot mantsy izany rano mafana sy savony manitra izany. Tsy misy rano hisasana tongotra akory raha ny marina fa voatery mantsaka eny amin’ny paompy. Tandra vadin-koditra hoy ny fitenenana ny fahantrana sy ny fahavoretrana, misy dikany amin-dRajeannot inona moa izay tongotra tsy misasa sy vava tsy mifantsana any! Ny hidabohan’ny loha eo am-pandriana no zava-dehibe, mivavaka mafy mba ho ireo laharana fiarakodia namenoina ny efajozo tamin’ny Loto no isa hivoaka amin’ny fisarihana.

Renoky ny torimaso teo Ra-Jeannot sy ny fahoriany. Mahavariana fa sakaiza mahatoky tsy mba misara-dalana amin’izay tompony mihitsy Ra-Fahantrana. Na matory na mitsangana dia tsy lavitra eo foana izy. Efa tany amin’ny 10 ora alina vao tsaroan-dRajeannot nanotika ny kibony; nanao diabe manara-penitra ihany koa mantsy ny rivotra sy ny kankana. “Tahaka izay tsy nividy Loto leity e! Itony ve tsy famitaham-bahoaka fotsiny!”, hoy izy sady nitazana ilay tapakila. Mitovy amin’ny lany vola avy nisotro toaka niaraka tamin’ny akama ihany ny bankin’ny loka. Mivoadivoady tsy hisotro intsony rehefa maraina ny andro; adino tery izany fanapahan-kevitra izany rehefa mifanena amin-dry zalahy ny hariva! Fantatry Ra-Jeannot fa hadalana no nataony nandany vola nividy ity tapakila-na Loto ity.
Nipetraka teo an-tongom-pandriany izy sady namoaka ny findainy. Mbola manana sms maimaimpoana miisa roa izy ka tapa-kevitra handefa hafatra ho an’ny anabaviny. “Salama ry bavy a. Tapaka tanteraka a ka mba vonjeo 50 mil e! So de mba misy kandra any fa mafy ny ady e”, sady nifokofoko nitomany ilay mpanjakan’ny diabe manara-penitra. Mafy loatra tokoa ny fahoriana mianjady amin’ny vahoaka Malagasy vokatr’izao krizy efa ho efatra taona izao. Firy ireo very asa tsy fidiny lasa mivaro-tena, mangalatra, misoloky etsy sy eroa. Tsy mahafantatra izany anefa ny Fitsarana, ny fampiharana ny lalàna no andraikiny ary mivoha midanadana ho an’izay diso lalana ny Fonja. Tokony mba isan’ireo olona nosaloran’ny TGV samboady ihany koa Ra-Jeannot. Tsy mba nandray anjara tamin’ireny fitokonana sy hetsika an-dalambe ireny mihitsy ny tenany. Naleony nanohy ny diabe manara-penitra nitady asa sy ny iray lovia isan’androny.