Ra-Jeannot

11/04/2013

Diabe manara-penitra (tohiny) “Fa ahoana ihany ianareo ‘tony ry Jeannot a! Olon-dehibe io ve de hindram-bola aman’olona foana no atao anton’asa! Maninona raha mba mitady asa fa tsy mirenireny fotsiny! ‘Ze toerana alehako toa ahitako anareo ‘zany foana”, hoy Fôsy zaodahin-dRajeannot. Isan’ireo olom-bitsy nahita fahasoavana nandritra izao Tetezamita izao i Fôsy. Tsy fantatra mazava izay tena anton’asany fa dia mifanisa amin’ny ratsan-tanany ny isan’ireo fiarany. “Chérie a! Mba omeo 350.000 fmg any aho hividianako J&B amin’le revirevy miaraka amin-dry zalahy CT sy CST rahariva; de 150.000 fmg ataoko lasantsy sy tsakitsaky”, hoy indray i Fôsy tamin’ny vadiny. Ginagina teo Ra-Jeannot nandre ny vola be ataon-dRafôsy indray mandrapaka amin’ny revy. “Iray hetsy be izao!”, hoy izy lasam-borona. Raha mba fantatr’ity zaodahy ity tokoa fa mitady asa no mampivezivezy an-dRajeannot manerana an’Antananarivo. Toa mora aminy ny miteny hoe “mandehana mitady asa”. Ririnin-dasa tokoa angamba iny 26 janoary 2009, ho an’ny mpitondra HAT ary ireo mpiray petsapetsa aminy. Saingy tsy nasian-dRajeannot dikany loatra intsony ny fandatsana natao taminy; izay hahazoany ilay ravim-bola TIM tokana iray no tanjony, dia izay! Toa ireny inona ireny mihitsy Fôsy mijery fitaratra eo anoloan-dRajeannot amin’izato “complet” manjelanjelatra, miampy kiraro marani-doha manondro eny amin’ny lanitra. Fanampim-bola fotsiny ihany ny 500.000 fmg nalainy tany amin’ny vadiny. Tazan-dRajeannot tsara mantsy ny namoahany ravim-bola TIM maro be avy tany anaty paosin’ny palitaony.

“Fa maninoa tokoa Jeannot raha manampy an’i Fôsy mandra-pahitana asa e? Mampalahelo ahy mihitsy le vadiko fa tsy tafody an-trano foana am’le be asa, indrindra rehefa miakatra ny entana avy any Tamatave. Voatery matory any amin’ny hôtely mihitsy izy”, hoy Charline anabaviny. Tsy te-hiteny zavatra betsaka amin’ity anabavikeliny anefa Ra-Jeannot. Marina tokoa ilay nambaran’i Fôsy fa mifanena matetika amin-dRajeannot izy. Mazàna misy tovovavy kely tsara tarehy hatrany miara-mivoaka aminy amin’ireny trano fandriam-bahiny ireny. “Toa kizitina be ‘zany le vadinareo ry bavy a! Tsy mety amiko ny miara-miasa aminy. Tsy te-hanimba fihavanana aho fa aleo amin’izao!”, hoy Ra-Jeannot sady nampirina ilay 50.000 fmg tany am-paosiny. “Sady ohatra ny adinon’ny vadinareo far y zareo ihany ange no nahatonga anay tsy an’asa tahaka izao e!”, hoy hatrany izy. “Ry zareo ahoana ry Jeannot a! Ndrao dia mba lasa lavitra loatra kosa ny tsy fitiavanao an’iI Fôsy e!”, hoy kosa Charline.”Ka marina ‘zany e! Ny olona toa an-dry Fôsy sy ny HAT no naha sômera ahy tahaka izao. Mora amin’ny vadinao ery ny miteny hoe ndeha mitady asa; nanana asa tsara mihitsy ange ‘zao bandy ‘zao no talohan’ny 26 janoary 2009 e! Zay fa lasa aho fa mampiakatra tosi-drà fotsiny ‘zany resaka ‘zany”, hoy Ra-Jeannot sady nanao veloma ny anabaviny.
Lasa mpiompy ireny alika avo razana ireny koa mantsy izao ry Fôsy mianakavy. “Taiza koa no mba nahafantaran’ilay tsy vanona ‘ty itony Bullmastiff sy Rhodesian Ridgeback itony?”, hoy Ra-Jeannot te-hanakenda mafy ity zaodahiny. Ny tsy fantany dia izao: tsy atakalon-dRafôsy an’ireto alika be ireto mihitsy izy. Sady mpiaro ny harenany ireto biby ireto no marika maha mpanan-karena azy. Ny karazan’olona toa an-dRajeannot indrindra no tena fahavalon’itony alika itony.