Ra-Jeannot

12/04/2013

Diabe manara-penitra (tohiny) “Vero taingenam-poooody aho ry namako ôôôôôô! Tsy folaka fa mannndefitra ry havako aaaaaaa!”. Mamo tampona Ra-Jeannot vao nivoaka tao amin’ny bar Tsimialonjafy. Tsimialonjafy araka ny anarany tokoa ity “bar” ity. Hita ao avokoa ireo karazan’olona nazeran’ny fiainana: ny maty vady, ny very asa, ny avy nigadra, ny nilazaon’olon-tiana, ny bokan-trosa, sns. Sady nihirahira mafy ny bandy akama no nandihindihy teny amin’ny arabe. Famoizam-po sa fanantenana?

Lalana roa ihany no tsy maintsy hivarinan’ny olona tra-pahoriana ratsy orina ara-pinoana: izay tsy latsaka anatin’ny toaka sy ny fidorohana, tatazan’ny sekta! Tsy lavitr’ilay tranga voalohany Ra-Jeannot, efa hatry ny ela rahateo ny tongony no tsy nanitsaka ny tokonam-baravaram-piangonana. Very “client” iray ndray izany ireo antoko-pinoana bôgôsy maniry ohatra ny anana eto an-drenivohitra. Mahomby tokoa mantsy ny dokam-barotra ataon’ireo sekta ireny. Ho azy ireo dia tsy misy afatsy ny fiangonany irery ihany no afaka hanome famonjena ny zanak’olombelona, izy ireo irery no afaka hanasitrana ny ferin’ny fahadisoam-panantenana. Ny rakitra sy ny ampahafolon-karena no atao betsaka dia hirifatra lavitra noho ny fandehan’ny TGV ny fahasoavana. “Rallye de miracle e!”
Mahavariana mihitsy isika lehilahy, izay angamba no maha samy hafa antsika amin’ny vehivavy. Nitsiry tampoka tao an-tsain-dRajeannot ny filàna, niserana teo imasony ny vatan’i Sidonie nofenjain’ny akanjo feno fihantsiana ka dia tapa-kevitra ny hamonjy ilay toeram-pitobian’ny menarana ranamana. “De ahoana am’zay Ra-Si a! Avereno am’zay le vavanao e! Inty am’zay ary ny bandy raha sahy enao!”, hoy Ra-Jeannot sady nikasika izay rehetra azony notsapaina teny amin’i Sidonie. “Mbay tany ry lapin a! Inona koa no ho vitan-tena mamo be io? Avy nangarom-paosy izy izany sa avy namaky trano no maimbo vava manao Jackson tahaka izao?”, hoy setriny. Loza tokoa ity tsy fitovian-tsaranga ity. Hatramin’ny fofon-toaka mivoaka amin’ny vava avy no misy hoe avo sy iva karazana. Midofaka manempotra izay manoloana azy ny fofom-bavan’ny olona mitovy saranga amin-dRajeannot; maha te ho tia kosa hono ny an-dry zareo avy nitelina J&B, Glenfidish, Martini, Jack Danel’s, sns.
“Mba mifohaza am’zay ry zoky e!”, hoy ny feo nitrerona nanaitra an-dRajeannot tamin’ny torimasony.