Ra-Jeannot

13/04/2013

Diabe manara-penitra “Mba mifohaza am’zay ry zoky e!”, hoy ny feo nitrerona nanapaka torimason-dRajeannot. Andiana pôlisy maromaro manao fisafoana amin’ny alina no nanaitra azy, toa nisava hatramin’ny hamamoany. Fiarakodia vitsivitsy mandrehitra jiro sisa no nisosa eny amin’ny arabe. Manomboka mitono masikita sy mangahazo kosa ireo mpivarotra hani-masaka, hitsenana ireo olon’ny alina, tsy mahita fahasambarana any an-tokantranony. Tsy mbola voabaikon-dRajeannot tsara ny ratsam-batany, miezaka hanarin-tena kanefa tsy tafatsangana. Ny finday sy ny lakilen’ny trano no tonga tao an-tsainy voalohany, nitony avy hatrany anefa ny ahiahiny rehefa voatsapany tao am-paosy ireto hany sisa harena. Folo minitra taty aoriana vao tafajoro tanteraka ranamana. Mangovitra sy mipararetra ny lohaliny, mihoatra lavitra hono ireny anti-dahy tsy afaka mamindra ireny.

Mandoro ny aty vavonin-dRajeannot ny alikaola nataony sakaiza nandritra ny tontolo andro. “Mba omeo rano kely rangahy azafady”, hoy izy tamin’ilay mpivarotra masikita. Notombanan’ilay mpivarotra ambony ambany Ra-Jeannot vao notolorany rano tamin’ny vera: “f’angaha de tsy mba mahalala honona mihitsy rangahy ‘ty rehefa misotro a? Mba samy mamely izao ihany ny olon-drehetra fa ny anareo toa tafahoatra !”, hoy hatrany ilay mpivarotra. Naleon-dRajeannot nisafidy ny fahanginana tsy namaly azy. Hiteny inona eo intsony koa moa e! Zara aza nahita rano, ny lalana mody rahateo koa mbola lavitra. “Mbola misy bus ve amin’izao ramose?”, hoy indray izy tamin’ilay tovolahy mpitono masikita. “Efa amin’ny folo ora alina ange izao razoky e! Aiza àry nareo zany!”, hoy ny setriny. Naka saina nipetraka teo amin’ny sisin-dalana Ra-jeannot sady nanenina mafy tamin’ny zavatra nataony. “Tahaka izay aho tonga de nody tamin’ny maraina. Ilay Doda tsy vanona iny ihany ange no nitaritarika tao amin’ny bar tao e! Danz be ty le!”, hoy izy niteny irery. Tamin’izay indrindra anefa no nisy niantso azy tery am-pita: “O ry le Jeannot tsy misaina ty a! Avia ialahy aty raha hirevy e!”. Nitodika Ra-Jeannot ka sady taitra no menatra mafy henatra nahita an’i Fôsy ary andiana lehilahy sy vehivavy maromaro. “Haingana ialahy raha hisotro f’aza mitavozavoza ohatra ny olon’ny adala eo e!”, hoy indray i Fôsy. Raha azony nataony ny nandositra nanao tongotra an-katoka dia izay no nataony. Saingy, tsy afaka noho ny antony roa mazava tsara: ny tena mbola mamo zara raha afaka mamindra, atao ahoana koa ny handà ny fanasan’i Fôsy.
Nazava tamin-dRajeannot ny zavatra hitan’ny masony: lehilahy telo ary vehivavy telo. Ny azo antoka aloha dia tsy misy anjarany amin’ireto vehivavy ireto. Izay mihitsy anefa no tian’i Fôsy ho hitan-dRajeannot, mba entiny hilazana fa mbola mahazaka sipa manja sady tanora lavitra mihoatra noho ny anabiviny Rafôsy. “Ohatra ny tsy hamely intsony aho ry valy fa tena mbola valaka be a!”, hoy Ra-Jeannot, nibaboka teo anatrehan’ny zaodahiny. Tsy nampoizin-dRajeannot anefa ny fihetsiky Fôsy. Ompa sy fanarabiana no nandrasany kinanjo ravim-bola TIM miisa roa no natolony. “Iny dia lasa ialahy mandeha any. Bandy manala baraka mihitsy ialahy ‘ty!”, hoy izy. Tsy misy dikany amin-dRajeannot intsony izany voninahitra izany. Raha ny fandroràna azy eny amin’ny tavany no hahazoany vola dia ekeny izany. Vola, tsy misy afatsy vola ary vola ihany.