Ra-Jeannot

16/04/2013

Diabe manara-penitra Nokaikerin’ny aretim-bavony nandritra ny alina manontolo Ra-Jeannot, tsy nahita tory fa nivadibadika tao am-pandriana mandra-maraina. Nivoadivody tsy hisotro toaka intsony ranamana, hanao izay handosirana lavitra an’i Sidonie ihany koa. Tsy handriny izay niposahan’ny masoandro hividianany “paracetamol” teny amin’ny “épicerie”. Efa lasa dokotera tenany daholo koa izao ny Malagasy noho ny tsy fahatakarana intsony ny saran’ny fitsaboana. Ny vavony no marary, “paracetamol” no fanafody. Izay ilay hôpitaly manara-penitra e! Tsy izay marary ny Malagasy no nihazakazahan’ny HAT fa ny bizna hamenoina ny paosin’ireo tompomenakelin’Ambohitsorohitra.

Teny an-dalana hiverina any an-trano izy no nifanehitra tampoka tamin-dRabelazao. AREMA hiringiriny mihitsy no nahafantaran’ny mpiray tanàna azy tany amin’ny taona 2001. Lasa TIM mafana fo indray taorian’ny krizy 2002 ary izao lasa mivavaka amin’ny TGV izao. Izay no nahatonga ny mpifanila-bodirindrina hiantso azy hoe Rabelazao. “O Ra-Jeannot a! Misy sera kely any raha mety amin’ty. Hotokanana le kianjan’ny Maki etsy Andohatapenaka ka mila fenoina olona ny tanàna fa ho avy eny ny henjana. Roa arivo ny an’ty, ka ahoana?”, hoy Rabelazao. Tonga dia azon-dRajeannot an-tsaina fa nisy didy antsy tany ho any; tsy miasa talata izany mantsy Rabelazao. Efa nisafidy ny ENY amin’izay rehetra mety hahazoany vola moa ny tenany, ankoatra ny mihondrika, ka dia nekeny avy hatrany ny seran-dRabelazao.
Nanaikitra an-dRajeannot mafy noho ny aretim-bavoniny ilay seran-dRabelazao. Vao ny omaly ny tenany no niteny tamin’i Charline anabaviny fa ny olona toa an-dry Fôsy sy ny HAT no nahatonga azy ho sômera tsy fidiny, izao nefa ndeha hameno isa ny olona hihoby ireo mpitondra eny amin’ny kianjan’ny Maki! “Vola adala tompo rangahy ‘zany a!”, hoy izy nampihonona ny tenany. Tsy manan-tsafidy tokoa rehefa mahantra, raha tsy izany ve mbola amin’ny alalan’ny “tee-shirt” sy vary iray kapoaka no hibaiko ny fifidianana eto amintsika, 52 taona nahazoana ny Fahaleovantena! Dia sahy milaza ve ny mponina eny ambany tanàna fa tena safidin’izy ireo ireny mpitondra nifandimby teto ireny?
Naleon’ny Ntaolo very tsikalakalam-bola toa izay very tsikalakalam-pihavanana. Izay koa angamba no tsy nampandroso an’ity Madagasikara ity e! Vitavita teny hatrany ny zavatra rehetra ndrao mantsy hanaratsy fihavanana. Nafangaron’ny Malagasy ny fihavanana sy ny fahamarinana ka raha vao resaka mety hanohintohina na hiniana hanohitohinana ny fihavanana dia naravina tamin’ny alalan’ny raharaham-pihavanana avokoa, eny hatramin’ny vonoana olona. Ankehitriny kosa, aleon’ny Malagasy very tsikalakalam-pihavanana amin’ny tsikalakalam-bola. Na arivo ariary mantsy izao hamonoan’ny sasany olona.