Ra-Jeannot

19/04/2013

Diabe manara-penitra (tohiny) Namotika fiainam-pianakaviana sy fiainan’olona maro tokoa ity krizy ity. Mba fantatry ny filoha Rajoelina ve ny fahoriana mianjady amin’ny isan-tokantrano, indrindra ny olana hatrehan’ireo ray sy renim-pianakaviana very asa noho ny fitarihany olona hidina an-dalambe ny datin’ny 26 janoary 2009? Mba fantatry ny mpitondra HAT ve ady aman’aina, ho velona sa ho faty, no andavan’andron’ny Malagasy nandritra izay efatra taona naha teo amin’ny fitondrana azy ireo izay? Tsy lafiny ara-materialy na ara-toekarena ihany no potika noho izao fitondran’ny filoha Andry Rajoelina izao fa indrindra ny ara-panahy, ny ara-moralin’ny mpiray tanindrazana. Olona nanana asa sy antom-pivelomana izao talohan’ny 26 janoary no lasa mivaro-pananana, mivarotra ny tsy azo hamidy, hihinanana vary iray lovia. Tsy mahagaga raha mirongatra izay tsy izy ny vaky trano, ny asa fisolokiana. Ny kibo tsy mba lamosina ry HAT a! Tsy mahavoky ny kianjan’Antsonjombe sy ny kianjan’i Maki ary ny tohatohabaton’Antaninarenina.

Ianareo sy ny orinasanareo mianakavy ao Ambohitsorohitra ao no matin’ny havokisana noho ny tombotsoa azo tamin’izany fa tsy vahoaka Malagasy velively. Ankoatra izany ny tsy fandriampahalemana izay tsy mamela ny isan-tokantrano mba hanana torimaso rehefa mandry fotsy ihany. Tsy azo ekena intsony izao zava-misy izao, mendrika ny hotsarain’ny vahoaka ianareo mpitondra ireo.
Nahavita dingana lehibe nihazo ny lalan’ny 4’mi Ra-Jeannot io maraina io. Nisaraka tanteraka mantsy ny vatany sy ny faladian-kirarony. Na Super Glue iray zinga aza tsy hahavita hanakambana azy ireo, tahaka ny tsy hahafahan-dRajeannot hiray amin’ny fiaraha-monina intsony koa. Ho tratran’i bebe Rabako anefa raha mijanona ao an-trano, ho avy koa ry mpikaty trosa isan-karazany. Efa tapitra namidy teny amin’ny Trondro daholo anefa ireo kiraro sy tennis fony mbola “olona”, nandoavana ny hofantrano, nanefaina ny faktioran’ny Jirama, sns. amin’ny fomba ahoana no hivoahana ny trano, handeha tsy mikiraro eny imasom-bahoaka? “Ny fahantrana no namana tsy mba manary izay tompony, miara-dia azy any amin’izay halehany rehetra”. Mahalasa saina ihany ity fiainan-janak’olombelona ity, kiraro iray monja no tsy misy na tsy ananana dia efa mampiova zavatra maro. Ora sy segondra koa sisa mantsy dia tsy hanan-trano intsony Ra-Jeannot. Aiza no handoavany ireo hofantrano firy volana, nanaovany fangalam-piery tamin’i bebe Rabako?
Sambatra hono ny olona mitanisa fahoriana noho ireo izay mitanisa fahasambarana. Isan’izany Ra-Jeannot nahatsiaro ny andro nividianany ity kirarony teny amin’ny Pavillon, roa andro nialohan’iny 26 janoary 2009 iny. Jejo ery namonjy ny toeram-piasana maika hampidera ny kiraro vaovao tamin’ireo mpiara-miasa. Fanaon’izy ireo mantsy ny manao diabe mividy mofo sy ranomboankazo isaka ny amin’ny folo ora, fotoana hifampiresahana zavatra hafa ankoatra ny asa. Ankehitriny, Ra-Jeannot irery sisa no hamakivaky lalam-piainana vaovao tsy misy mpitia, tsy misy mpanontany ary tsy misy indra fo.