Ra-Jeannot

20/04/2013

Diabe manara-penitra (tohiny) “Azafady madama, marary mafy eny amin’ny hôpitaly ny zanako. Tsy manam-bola hamidy fanafody ka mba mangataka izay foinao re tompoko!”, hoy Ra-Jeannot tamin’ity renim-pianakaviana iray miandry olona tao anaty fiara. Fantany tsara fa tsy hisy hanome na dia ariary aza olona raha tsy mitady hevitra sy mamorona lainga mba hahatohina ny fon’izay mandre ny fitarainany, indrindra fa reny manan-janaka tahaka ity sendra azy tetsy anoloan’ny Fitsarana Anosy ity. Atao ahoana tokoa no hilaza fa tsy nihinan-kanina nandritra ny alina kanefa lehilahy “mirijarija be” izao, tsy kilemaina! Nahomby tokoa ny tetika, namoaka vola arivo ariary tany anaty paoketrany ilay madama ary natolony an-dRajeannot. “Misaotra tompoko, Andriamanitra hamaly fitia anao sy ny ankohonanao”, hoy izy.

Nanjary nahafantatra ny fisian’Andriamanitra ary nahatonona ny anarany tampoka teo Ra-Jeannot. Fady azy mihitsy izany hanitsaka ny varavaram-piangonana izany tamin’ny andro firavoravoana, mbola nanana an’asa, nitafy sy nihinana ary nanan-trano nisitrihana. Lasa vola be ho an-dRajeannot ilay arivo ariary “fanimpiny” ho an’i Zefa mpamily, indrindra avy mangala-dia ivelan’ny lalana tokony naleha.
Teo vao nazava tamin-dRajeannot fa manana ny anjarany avokoa ny olon-drehetra. Tsy lanin’olona iray mandritra ny indray andro ny vola arivo ariary, ho an’ny saranga mitovy aminy. Ariary zato dia efa mihinana vary amin’anana, efajato ariary dia mihinam-bary sy laoka ary telonjato ariary kosa ny lasopy sinoazy. Valonjato ariary eo ho eo izany no tontalin’ny sakafo maraina, antoandro ary hariva ho an-dRajeannot sy ny mira lenta aminy. Tsy hiadiana hevitra kosa aloha izay tsirony sy ny fofony ary ny fahadiovany. Rehefa nitsako ny vazana dia izay no zava-dehibe; atao be sakay fotsiny dia mba tsembotsemboka e!
Fomba fiteny moa ny hoe “izay hohanina androany tadiavina androany”; ny an-dRajeannot kosa “ny tokony hohaniny omaly tsy mbola hitany androany”. Izay ratsy fitàna lanin’ny mamba hoy ny Ntaolo. Feno herinandro izao no naha mponin’Analakely an-dRajeannot fa tsy mbola nisy niova na teny iray aza ilay paikady fangatahana vola amin’ireo renim-pianakaviana sendra azy eny an-dalana eny. Fenony hatrany ny “versement” arivo ariary isan’andro; izany hoe mihinam-bary amin’anana maraina, mikaly tsara ny antoandro ary misotro lasopy ny hariva. Tsy miasa saina amin’ny hofantrano sy ny Jirama intsony Ra-Jeannot. Sambany tato anatin’izay efatra taona nahavery asa iza no nananany “mpanampy”, mpamafa ny toerana fatoriany amin’ny alina. Vao mangiran-dratsy tokoa mantsy dia efa manadio ny arabe sy ny toerana fahelam-bahoaka ireo mpiasan’ny kaominina an-drenivohitra. Faly èry Ra-Jeannot mitazana azy ireo amin’izany.