Ra-Jeannot

22/04/2013

Diabe manara-penitra (tohiny) Miova araka ny zava-misy iainany ny foto-pisainan’ny olona. Nanana ny fomba fijeriny an’ireo tsy manan-kialofana mpatory an-dalambe Ra-Jeannot fony mbola “olona”. Isan’ireo mahatsiaro no tandindomin-doza hatrany isaka ny mandeha eny Analakely vokatry ny fitomboan’isan’ireo 4’mi. Amin’izy ireny ihany mantsy no hivoahan’ny mpanao sinto-mahery sy ny mpanendaka. Lasa mpisolovava ireto sarangan’olona ireto anefa ny tenany ankehitriny satria efa Izy ihany koa. Mifamaly matetika amin’ireo mpiasan’ny CUA ny tenany, mpanangana ady amin’ireo mpamily fiarakodia ary lasa nankafy sy fandikan-dalàna sy ny tsy fanarahana fitsipika: mivalan-drano eny an-tsisin’ny arabe, matoritory eny amin’ny zaridaina, sns. Fehiny, ilay maha olona mihitsy no potika niaraka tamin’izao fitondran’ny filoha Rajoelina izao.

Teraka tao an-tsain-dRajeannot ny fialonana sy ny fankahalana izay rehetra mbola misakafo sy manan-trano. Fahavalony avokoa izay rehetra hitan’ny masony ka tsy hisalasalany na iray minitra aza ny handroba izay sendra azy. Taratra iray hilazana fa tsy vahaolana maharitra ny fampihavanam-pirenena heverin’ny FFM hatao manoloana izao faharavan’ny fiaraha-monina Malagasy izao. Tsy hisy fihavanana azo antenaina ao anatin’ny tsy fitovian-tsaranga sy ny elanelana ara-toekarena eo amin’ny samy mpiray tanindrazana. Ny tsy manana tsy maintsy malahelo; ny manana kosa tsy maintsy mailomailo. Manjaka ho azy eo amin’ny samy mpiara-belona ny ahiahy, ny fisaraham-bazana, ny fialonana izay miteraka tsy fandriampahalemana. Pitik’afo kely monja dia ampy handrehitra ny ady. Fantatr’ireo mpanao politika tsara izany ary nampiasainy hatrany nandritra izay krizy nifandimby teto amin’ny firenena izay. Very teo am-pelatanan’ny Malagasy ilay toe-panahy nampiavaka nanao hoe: “tanan-kavia sy havanana, izay didi-marary”.
“Iny e! Mpangalatra e! Mpangalatra e! », hoy ity ramatoa iray niantso vonjeo sady nihazakazaka mila hianjera amin’ny tany. Toa izy indray nefa no noheverin’ny olona ho adala, misy mihaino hoy ilay fomba fiteny. Olona samy donton’ny fiainana sy ny olana any an-tokantranony avy no niantefan’ny antsony, ny sasany aza mbola mandatsa azy indray koa : « ety Analakely avy koa ve ry madama ka mbola mizesta amin’ny rojo volamena a! ». Izany hoe, efa tsy azon’ny Malagasy atao intsony izany ny mihaingo sy mipôzipôzy.
Kisarisary maro no teo anoloan’ny mason-dRajeannot sady nanohy ny dia maika: fitafiana vaovao, sakafo matsiro, sns. Efa lavitry ny fisamborana sy ny fanenjehana mantsy ny tenany. Naka toerana teo amin’ny zaridainan’Antaninarenina Ra-Jeannot, nanombatombana ny mety ho vidin’ity rojo volamena matevina norobainy teny am-bozon’ny fahavalony. “Tsy alefako latsaky ny deux millions kosa ‘ty”, hoy izy. Azy no fiheverany ilay rojo volamena, izy no tompon’ny teny farany amin’ny vidiny.