Ra-Jeannot

23/04/2013

Diabe manara-penitra ”Iray hetsy ry leiry e! Maditra kosa ‘ty zany ry sakaiza an! Vaky trano taiza ‘ndray ‘zao ‘tony?”, hoy ity mpividy entana efa niasa tamin-dRajeannot. Tsy rototra akory izy namaly izany: “an’ny vadiko marary eny amin’ny hôpitaly iny razoky e! Aleo hilamina raha 500 mil fotsiny no hasahian’ty azy e!”, sady nalain-dRajeannot teny am-pelatanan’ilay rangahy ny rojo volamenany. Niova hevitra tampoka indray anefa ity farany: “ampiako 250 mil ny volan’ty e! Mi-risk be ange za am’zany razoky e! F’angaha azo hamidy am’zao ty fa tsy maintsy mbola hitady mpanefy handrendrika azy”. Nahazo aina tampoka Ra-Jeannot, fantany tamin’ny alalan’ny fihetsik’ilay mpividy fa tsara ny entana ary mbola azo atao ny mampiakatra izany ho ambony kokoa. “Aleo entiko ny ahy rangahy a! Na halatra aza ve de rojo be tahaka izao de hamidiko aminao 750 mil!”, hoy ihany izy nampifila.

Tapa-kevitra Ra-Jeannot fa hitady mpividy hafa. Sopapa ho azy fotsiny ihany no nilàny ilay voalohany. Efa azony toky aloha izao fa tsy latsaky ny dimy alina sy iray hetsy no vidin’ity rojo volamenany ity. Ramatoa vaventy misikina lamba indray no mpividy faharoa. Avy hatrany dia nokapain-dRajeannot efatra hetsy ny tombana. Tsy namaly avy hatrany kosa ilay mpividy fa namadibadika ilay rojo, toa mandanja azy eny an-tanany. “Roa hetsy no sahiko ramose a!”, sady natolony an-dRajeannot ny entana. Nekeny avy hatrany ny tolo-bidy, natahotra mantsy ny tenany ndrao hiverina amin’ny heviny ilay ramatoa. Raikitra ny inty sy nday, samy tsy tia ny azy hoy ny tanora izay.
Mora vakiana tahaka ny gazety ny karazan’olona tahaka an-dRajeannot itony. Fihetsika kely monja dia fantatra hoe vao avy nahazo vola. “Andevo tokana an-trano mantsy hono, na maty voky na maty noana”. Karazan-tsakafo telo be izao no indray teo anoloan-dRajeannot: voanjobory sy hena kisoa, composé ary trondro saosy. Nisolitika nanerana ny saokany ny menaka sy ny karaoty natao lasary. Efa in-dimy nanampy jus sahady izy teo anelanelan’izany. Tsy mampitaintaina an-dRajeannot tokoa mantsy ny handany iray alina amin’izao arôzazy izao; rahoviana vao ho lany ny vola roa hetsy e! “Efa ela mihitsy leisy ialahy ‘zany ry Ra-Jeannot no tsy nampiasa kirdan!”, hoy izy miramirana mitazana ireo olona misisika taxi-be.