Ra-Jeannot

24/04/2013

Diabe manara-penitra (tohiny) “Tadidinao ve madama ny endrik’ilay mpanendaka raha sendra mifanena aminao?”, hoy ity “brigadier de police” nandray ny fitoriana napetraky ny tompon’ilay rojo volamena. “Eny tompoko. Tadidiko tsara ary ny tena nanaitra ahy aza dia ny paoziny. Tsy lehilahy ampoizina hanendaka izany mihitsy raha ny fijery azy. Ny tongony aza mbola madio, ny tiako hotenenina hoe vao haingana no angamba izy iny no tsy nikiraro”, hoy kosa ilay madama. “Inty ny laharan’ny findaiko koa raha vao mahita azy enao dia miantso avy hatrany. Miteny fotsiny enao hoe ilay madama very rojo volamena”. “Misaotra indrindra tompoko !”.

Tsy tazatazana firy teny amin’ny Avenue tokoa Ra-Jeannot efa ho herinandro izao. Nifampanontany avokoa ireo 4’mi sy mpatory an-dalana mpanao rami miaraka aminy. Efa mahazatra azy ireo moa izay fiaraha-monina izay, tsy mahagaga azy ireo intsony koa. Maro amin’ireto saranga ireto mantsy no manjavona mandritra ny dimy na enim-bolana, miverina eny an-tsaha ihany avy eo. Niala sasatra kely teny Antanimora ny ankamaroan’izy ireny. Ao kosa ireo voatery nisintaka kely ny renivohitra rehefa avy nanapoaka bizna goavana ka isan’ireny Ra-Jeannot. Tsy lasa lavitra akory fa manodidina eo ihany, mandra-pilamindamin’ny tanàna.
Ny tànana zatra mitsotra hono tsy afaka mivonkona intsony. Telo andro monja taorian’ny niverenan-dRajeannot teny an-tokontaniny dia efa nanapoaka rojo volamena fanindroany ny tenany. Lafony iray tapitrisa ny entana ka dia iny indray aloha izy no manjavona tsy hita. Teo vao fantatry ny “iray tanàna” aminy fa Ra-Jeannot ilay mpanendaka rojo volamena karohan’ny mpitandro filaminana. “Tena le Zanô fotsy kely iny leity no manaratsy endrika antsika eto a! Ndao hiantsoana “prà” raha vao miverina eo. Amin’zay tsy mba mizara fa mirevy seul any!”, hoy ireto mpatory an-dalana iray “fokontany” amin-dRajeannot. Tsy vitan’ny norobainy fotsiny mantsy ny rojo volamena teny am-bozonan’ilay madama fa narahany daroka. Naratra mafy vokatr’izany ilay ramatoa. Namoaka ny sarin’ilay voaroba avokoa ireo gazety mpiseho isan’andro. Mankahala an-dRajeannot daholo ny olon-drehetra, eny hatramin’ireo 4’mi tsy manan-kialofana.