Diabe manara-penitra (tohiny)

26/04/2013

“Very asa noho iny fandrobana tamin’ny 26 janoary iny aho. Mbola vitako ny nandoa ny hofantrano sy ny Jirama telo volana taorian’izany. Niezaka nitady asa nanerana an’Antananarivo aho, miala maraina tsy mody raha tsy alina saingy niala maina sahala amin’ny nandevina alika. Ringana tanteraka ny tahiriko rehetra, voatery namidy tsikelikely ny fanaka sy ny kojakoja tao an-tranoko, niantohana ny hofantrano, ny Jirama ary ny sakafo sy ny saran-dalana.

Nanana “chaîne” JVC be novidiako tao amin’ny Naza izay aho. Latsaka hatramin’ny ranomasoko mihitsy nahita ny nibatan’ilay bandy nividy azy nivoaka ny tranoko. Gravy ry zalahy a! Zavatra niharian’ny tena nandritra ny firy taona no ringana ao anatin’ny indray mipi-maso noho ity HAT, HAT ity.
Mahatsiravina ahy na ny mahita an’ireto CT sy CST ireto amin’ny télé, indrindra ity Rajoelina miseho ho inona ity kanefa ny fiainan’ny olona potika noho nataony”, hoy Ra-Jeannot tamin’izy valolahy niaraka taminy tao amin’ny “violon”. “Marina mihitsy ‘zany razoky e! Izao ve le fanovàna nampiesonana ny bandy teny amin’ny 13 may? Tena aleo ihany rangahy tamin’ny andron-dRavalo a! Izaho aloha raha tafavoaka eto dia hanao propagandy izay tsy hahalany an’ireto ekipan’Ambohitsorohitra ireto na tsy misy karama aza e!”, hoy indray kosa ity tovolahy vao 23 taona, niantoka entan’olona kanefa tsy hanaloa vola.
“Iza le Jeannot e? Mivoaha tao ialahy! Mba ohatra izao ihany ve leisy de manendaka no atao fivelomana. Maninona raha mitady asa leity a!”, hoy ilay mpitandro filaminana taminy. Kely fotsiny no tsy nitenenan-dRajeannot fa ianareo mpitandro filaminana no tena fositr’izao fahavoazany izao. Nitazam-potsiny teo anatrehan’ny fandrobàna ny fananan’ny vahoaka mpandoa hetra tokoa mantsy ny mpitandro filaminana tamin’io datin’ny 26 janoary io. Mpiray tsikombakomba tamin’ireo mpandroba mihitsy aza no hilazana azy ireo. Adinon’ireto mpitandro filaminana ireto na tsy misy dikany aminy raha marina kokoa, fa ny hetra haloan’ny vahoaka no handoavana ny karaman’izy ireo. Iza no tsy mahalala fa CEMGAM tamin’izany fotoana izany ny ministry ny Foloalindahy amin’izao fotoana, ny jeneraly Rakotoarimasy Lucien; lefitra voalohan’ny FIGN tamin’izany ny jeneraly Bruno Razafindrakoto izay lasa komandin’ny Zandarimariam-pirenena voalohany nandritra ity HAT ity? Maro amin’ireo mpitandro filaminana mbola am-perin’asa amin’izao fotoana izao no nitàna andraikitra tamin’ireny andron’ny 26 janoary ireny ary izany no antony tsy hanokafana fanadihadiana manodidina iny fandrobàna tsy roa aman-tany iny. Nomelohin’ny Fitsarana higadra ry Lalatiana sy Fidèle tao amin’ny Free FM satria nitarika olona teny an-dalambe niharo famotehana fananam-bahoaka sy olon-tsotra. Maninona koa raha tsaraina ny filohan’ny HAT, nitarika ny olona teny an-dalambe sady nanome tso-drano tamin’izany. Aman-jatony ny olona maty, an’arivony miliara ny foto-drafitrasa sy fananana potika nandritra iny 26 janoary iny.
“Ekeko tompoko fa izaho no nanendaka an’ireo madama roa ireo. Namidiko teny amin’ny Petite vitesse daholo ireo rojo ireo; roa hetsy ny voalohany dia tahaka izay koa ny faharoa”, hoy Ra-Jeannot namaly ny fanontanian’ny mpaka am-bavany. “Ndao ento any amin’izay namarotan’ialahy an’ireo rojo ireo aho ary aza mandainga mihitsy na kely aza fa hahita loza ialahy. Bandy mba nianatra ihany ve leisy de lasa manendaka, tsssss!”.