Ra-Jeannot

28/04/2013

Diabe manara-penitra (tohiny) « Mandroso ianao madama a ! Eto am-panaovana “enquête” an’le bandy ‘ty mihitsy ‘zao. Izy aloha sa tsy izy le nanendaka ny “collier”-nao e? Tsy efa niteny taminao ve aho madama fa tsy maintsy tratra zany mpanendaka zany raha mbola izaho no izaho e ! », hoy ilay mpitandro filaminana dehaka. « Eny, izy tokoa io tompoko ! Mba mahazo miresaka irery aminy ve aho tompoko ? », hoy ilay madama. “Tsy olana mihitsy ‘zany madama a! Sady mba hisakafo kely any ivelany any vetivety aho mandra-piresakareo. Na izany aza aleo petahako “menotte” ihany aloha ny tanany ndrao mitsoaka eo vao gravy”. Dia lasa nivoaka ny efitrano ilay pôlisy; Ra-Jeannot kosa nitanondrika tsy sahy nijery ny tavan’ity olona norobainy.

“Fa minona no tsy sahy mijery ahy ianao ry tovolahy?”, hoy ilay madama tamin’ny fiteny feno fitoniana. Nitraka tsikelikely nijery ilay madama Ra-Jeannot. Tsy olona vonon-kiady akory fa olona resy vonona hanolotra ny tendany ho tapahana. “Mifona aho madama. Mangataka famelan-keloka aminao aho”, hoy izy nangovitra. “Efa nampianarin’ny Tompo hamela heloka isika ry tovolahy ary izany no anton-diako aty izao. Mba tiako ho fantatra kosa ny antony nanaovanao ireny toetra mamohehitra ireny”, hoy ihany ilay renim-pianakaviana. Ranomaso nipatrapatraka anefa no valinteny azony avy tamin-dRajeannot. “Tsy fidiny ahy tompoko no nahatonga ahy nanao ireny. Mafy loatra ny zavatra nanjo ahy. Tapitra namidy avokoa ny fananako rehetra, ringana ny tahiriko. Tsy voaloako intsony ny hofantrano dia izao lasa mpanendaka an-dalambe izao. Mifona aho tompoko!”, hoy Ra-Jeannot nibaboka ny fiainany manontolo. “Niasa izany ianao teo aloha raha azoko tsara?", hoy indray ilay madama. “Eny tompoko! Niasa mihitsy aho talohan’ny 26 janoary 2009. Isan’ireo voaroba nandritra iny 26 janoary 2009 ny orinasa niasako. Tsy rariny, tsy rariny”, hoy izy nitoto tany.
“Vita ny resakareo tato madama? Aleo hotohizana amin’izay ny fanadihadiana dia mandeha misambotra izay namarotan’ilay adala ity ny rojo volamenanao isika aorian’izay”, hoy ilay mpitandro filaminana. “Mba afaka miresaka amina vetivety ve aho azafady indrindra?”, hoy ilay madama. “Tsy misy olana mihitsy! Aleo àry aloha izy haveriko any amin’ny “violon” e! Mitsangana ialahy ry Jeannot maditra a! Ndao aloha maka saina kely any amin’ny “violon”. Mbola ho lava ny antsika roalahy androany”. Nitsangana moramora Ra-Jeannot, reraky ny hanohanana sy ny adin-tsaina, nanopy maso tany amin’ilay madama, toa miangavy fihantrana farany.