Ra-Jeannot

29/04/2013

Diabe manara-penitra (tohiny) “Tsy afaka mandray fanapahan-kevitra amin’izany aho ry madama fa aleo mihitsy ianao miresaka amin’ny lehbenay a!”, hoy ilay mpitandro filaminana. Nilaza tamin’ity farany fa hanala ny fitoriany mantsy ity renim-pianakaviana ity rehefa nandre ny fibabohana sy ny tantaram-piainan-dRajeannot. Izay famelan-keloka izay no mampiavaka ny kristiana izay mifandona matetika amin’ny lalàna. Zava-dehibe ho an’ny mpitandro filaminana araka ny andraikitra nankinina taminy ny fahazoana ireny mpanendaka, mpanao sinto-mahery, ireo mpandika lalàna amin’ny ankapobeny. Fampiharana ny lalàna kosa no adidin’ny Fitsarana ka tsy hijerena tavan’olona na finoana na saranga raha ny tokony ho izy. Samy mametraka ny lafiny maha olona ho farantampony avokoa anefa ireo sehatra voalaza rehetra ireo.

“Tsy afaka ny hisakana anao hanaisotra ny fitoriana mihitsy izay ry madama. Zonao feno tanteraka izany kanefa ndrao dia hiteraka fahavoazana ho anao. Firy akory ny olona mifampiraharaha eto aminao, manala ny fitoriany. Tsy tanteraka araka ny tokony ho izy izay fifanarahan’izy ireo any aoriana, izahay indray no mahazo izao fanaratsiana rehetra izao. Manao taratasy mazava tsara ianao fa hanaka ny fitorianao ary tsy misy arakaraka dia havotsotray izy”, hoy ity lehibe. Ra-Jeannot kosa etsy an-kilan’izany manisa ny minitra sy segondra farany hijanonany ety ambonin’ny tany. Ao anatin’ny sarotra tokoa ny olona vao mahatsiaro sy miantso ny anaran’Andriamanitra. Izay indray koa mbola mampiavaka ny kristiana. Manana faharetana sy fanantenana ny olona manankina ny fiainany amin’Andriamanitra. Hoy ny Tompo: “Antsoy Aho amin'ny andro fahoriana, dia hamonjy anao Aho, ka hanome voninahitra Ahy ianao", Salamo 50:15.
Naharitra 45 mn ny fifandresen-dahatra nifanaovan’ilay madama tamin’ilay lehibe. Tsy misy afaka ny hilaza tokoa mantsy fa hiova famindra ka tsy hamerina ny ratsy nataony Ra-Jeannot. Loza mitatao ho an’ny filaminam-bahoaka araka izany ny tenany ary izay indrindra no maha sarotiny ny mpitandro filaminana sy hanomezan-tsiny azy ireo mazàna. Nivoaka ny varavarana ilay renim-pianakaviana ka nihazo ny birao fanaovana fanadihadiana. Tazan-dRajeannot avy teo amin’ny makarakara izay fisehoan-javatra rehetra izany. Niato nandritra ny segondra vitsy ny fitempon’ny fony; akaiky ny ora hanova ny fiainany iray manontolo.