Ra-Jeannot

30/04/2013

Diabe manara-penitra (tohiny) “Iza le Ra-Jeannot? Mivoaha ialahy tao!”, hoy ny feo mibetroka tany an-dalantsara. Toa ny lakolosim-paty no nandrenesan-dRajeannot ilay antso. Lalan-droa ihany ary tsy misy afatsy izay no miandry azy: na mivoaka ny “violon” dia miditra any am-ponja na mivoaka ny “violon” dia hamantana arabe. Sambany taorian’ny nialàny tao amin’ny tranony mantsy izany hoe natory ambany tafo izany nandritra ny 48 ora nitànana azy tao amin’ny pôlisy. Samy hafa mihitsy ny matory anatina rindrina efatra sy ny mirakotra plastika eny amoron-dalana. Fiaraha-monina iza intsony koa moa no mila olona toa an-dRajeannot, hampitombo isa ny vava mihinana? Fantany fa tsy hisy hivaky loha sy handany fotoana hitady azy. Ny fonja sisa no toerana azony antoka fa hampiantrano azy anaty rindrina efatra, tsy miasa saina amin’ny hofantrano sy ny faktioran’ny Jirama. Ampahafirin’ny fahoriana nolalovany mandra-pahatongany teny amoron-dalana tokoa moa izay miditra any am-ponja; fahoriana inona intsony no ambonin’izany hoe voatery nivarotra izay rehetra nihariana sy ny teo am-pelatanana noho ny hetraketraky ny hafa?

“Iza amin’ireo kandidà 48 ireo izao no hofidian’ialahy ry Ra-jeannot?”, hoy ilay pôlisy nihanihany taminy. Vaovao tsara ho azy ny fandrenesana io fanontaniana io, tsy hivantana eny am-ponja mantsy no dikan’izany. “Izay hahitàna vola hamidy sakafo sy lavaka hisitrihana izao rasefo no maha maika a!”, hoy izy mody mampalahelo. “Ndehana indray leity miverina manendaka a! Ohatra iny madama iny avokoa mantsy ny olon-drehetra amin’ialahy!”, hoy hatrany ity mpitan dro filaminana. Azony antoka tanteraka teo fa ao anatin’ny minitra vitsy monja dia handao ity paositry ny pôlisy ity ny tenany. Naverina taminy avokoa ireo entana notànana nandritra izay roa andro niantranoany tao amin’ny “violon” izay, nanao sonia teo amin’ny boky dia izay.
Tsy zakan’ireo zatra miaina anaty haizina ny fanjelatry ny hazavana. Jambena tanteraka ny mason-dRajeannot notarafin’ny masoandro raha vao nanitsaka ny tokontanin’ny paositry ny pôlisy. Toa ireny tsy tompon’ny tenany ireny izy nivoaka ny vavahady. Mamy loatra izany afaka izany, tsy voavidim-bola ny fahafahana! Tsy nandingana folo metatra akory anefa Ra-Jeannot dia naka sisin-drindrina. “Ho aiza?”, hoy izy nanontany tena na dia efa fantany aza ny valiny. Natokana ho an’ny manan-katao mantsy izany fanontaniana hoe “ho aiza” izany satria izy ireny no manan-tsafidy ny amin’izay halehany. Tsy misy afatsy ny arabe kosa no an’ny karazan’olona toa an-dRajeannot.