Ra-Jeannot

02/05/2013

Diabe manara-penitra (tohiny) Tapa-kevitra hamonjy ny anabaviny Ra-jeannot ary hizaka izay latsa sy fanesoana hataon’i Fôsy zaodahiny. Tsy isan’andro tokoa mantsy ny fetin’ny ankizy ary azony antoka tsara fa tsy maintsy hihazo an’Antanimora ny tenany rahatoa ka hiverina hanampy isa ny fokonolona an-dalambe.

Tsy maintsy hiroso amin’ny asa fanendahana na ho lasa mpangataka; izay ihany no lalam-bola hihinanana vary lovia. Tsy misy afatsy izay fiverenana any amin-dranabavy izay ihany no vahaolana ho an-dRajeannot. Toa efa miandry sy mailo aminy izany avokoa izay rehetra mifanena taminy; ny sainy tokoa ve no efa mamitaka azy sa izay ilay tonga amin’ny fomba fitenenana manao hoe “aleo henjehan’ny omby masiaka toa izay henjehan’ny eritreritra”! Tsy niafina taminy aloha ny tsy fankasitrahan’ireo 4’mi ny fiverenany. Mba manana ny sata mifehy azy ihany mantsy izy ireo. Tsy natao ho an’ny olona mbola manana fanantenana ity fiaraha-monina iray ity, koa rehefa nisafidy ny hiditra ao aminy dia manaiky fa hitoetra ao mandrakizay. Tsy natao tohatra fiakarana ny fiainana an-dalambe ary izay no nahadiso ny kajikajin-dRajeannot.
“Mandroso ianao monsieur le CT! Ianao sisa no nandrasana. Efa complet ny ekipa ary hialana tsiny indrindra raha efa nanomboka izahay. Mba omeo vera kely ange ry chérie ity zokibentsika ity a ! Izy no vadiko monsieur le CT ka hosora-menaka sa… ? », hoy Fôsy nampandroso ity vahiny manan-kajany. Tsy navelany no tsotsotra mihitsy ny fandraisana ity mambra ao amin’ny Kongresin’ny Tetezamita ity fa narahany fandraisam-pitenenana: “Azafady fa mba hiteny kely e! Voninahitra ho anay mianakavy ny fahatongavanareo amin’izao lanonana tsotsotra izao, indrindra ianao Mr le CT. Fantatra tokoa fa be ireo adidy miandry anareo eto amin’ny firenena kanefa tsy navelanareo ho irery izahay mianakavy. Ka dia manainga antsika rehetra hampiakatra ny vera ho mariky ny fisaorana e!”.
Samy te hanome ny sezany ho an’ny ingahy CT avokoa ireo vahiny rehetra nasain-dry Fôsy mianakavy, hatramin’ireo zoky olona avy no niala tamin’ny sezany ho fanomezam-boninahitra ity mambra ny Kongresin’ny Tetezamita ity. Nandravaka ny latabatra voarakotra lamba fotsy mangatsakatsaka ireo tavoahangy maro karazana. Misy izany J&B sy Johnny Walker izany, Skol sy Libertalia, ankoatra ireo ranom-boankazo anaty baoritra. Nirantiranty teny amin’ny ambony lovia kosa ny sambos, nem, ny cochon de lait, ny akoho voatono, ny charcuterie isan-karazany, ny olive, sns. Hanim-pitoloha e! Vao misokatra ny vavan’ingahy CT dia mitodika any aminy avokoa ny mpanotrona rehetra. Mazava ho azy fa ny toe-draharaha politika amin’izao fotoana no mibahan-toerana amin’izany ary mahagaga tokoa fa mino izay voalazany avokoa ny iray trano. Ry Fôsy amin’izany tahaka ireny olona efa niaina tao anaty politika an-taonany maro ireny mihitsy, mampiakatra sy mampidina ny lohany ho mariky ny fankatoavana ny famelabelarana ataon’ingahy CT. Ry madama Charline anabavin-dRajeannot kosa miezaka mitsiky mba hilazany angamba fa maharaka tsara ny adihevitra ny tenany.